FIU ta alerta riba riesgo di crypto, structura complica y doño scondi di compania

ORANJESTAD – Crimen financiero ta bira mas complica, mas internacional y mas digital. Esaki ta un di e mensahenan principal den Annual Report 2025 di FIU-Aruba.

E raport ta indica cu Aruba, como economia chikito pero hopi conecta cu mundo, ta expone na riesgo cu ta bin for di otro paisnan. Rednan criminal transnacional ta genera placa ilegal door di trafico di droga, trafico di arma, trata di hende, mineria ilegal y corrupcion. E placa aki por pasa door di sistema financiero, comercio y rednan informal.

FIU-Aruba ta pone atencion special riba virtual assets y crypto. Aunque e riesgo aki ainda no ta domina mercado local, FIU ta indica cu e desaroyo di tecnologia financiero por crea oportunidad pa fraude digital, lavado di placa transfronteriso y tapa fluho di placa.

Otro punto importante ta transparencia di beneficial ownership, es decir: ken ta e persona berdadero tras di un compania of estructura legal. Aruba a introduci legislacion pa companianan declara nan beneficiario final na Camara di Comercio, pero segun FIU, mester sigui fortalece verificacion, control y sancion ora informacion no ta correcto of actualisa.

Pa FIU-Aruba, e siguiente paso ta sigui modernisa capacidad analitico, tecnologia y cooperacion entre institucionnan, pa Aruba por keda fuerte contra forma nobo di crimen financiero. Lesa e rapport completo AKI.