Analisis: NoticiaCla 12 aña despues: Mesun mision, pero den un bachi nobo

Scirbi pa Tito Laclé

Ta manera cu ta ayera mi a publica e prome edicion di NoticiaCla, un plataforma periodistico independiente crea cu un solo meta: brinda Aruba un alternativa serio, responsabel y digno di confianza den periodismo. Sinembargo, ya pasaronan 12 aña. Ora mi mira bek, no ta solamente e lansamento mes cu ta destaca, sino tambe e fecha riba cual tur cos a cuminsa.

NoticiaCla a drenta oficialmente den aire riba 2 di juli 2014.

No 1 di juli, manera cu hopi hende lo a spera ora bo ta cuminsa un proyecto nobo of un luna nobo. No. 2 di juli. Y esey tabatin un motibo hopi practico.

Mescos cu awe, mundo tabata completamente den ambiente di Mundial di Futbol. (Aunke, pa bisa berdad, pa mi personalmente e emocion ya a baha un tiki, awor cu tanto Hulanda como Corsou a keda afo.) Pero tambe 12 aña pasa Mundial tabata den su momento mas cayente y riba 1 di juli tabatin un partido importante. Mi a pensa simplemente cu hopi poco hende lo a bay na un lansamento di un medio di comunicacion e dia ey.

P'esey nos a tuma e decision pa move e presentacion oficial pa 2 di juli, na Divi Links.

E minister encarga cu Telecomunicacion e tempo ey tabata Mike de Meza, kende a haya e honor di primi e boton cu oficialmente a lansa NoticiaCla.

Dos bon amigo den mundo di media —Ruben Garcia (dfm) y Ralph Maduro di Power FM — a kere den e proyecto for di e prome momento y hasta a transmiti e evento en bibo.

Un otro persona cu tabata presente e dia ey y cu te awe ta sigui apoya mi ta columnista y personalidad Arubiano Rona Coster.

Mi kier expresa tambe mi sincero gratitud na tur persona cu a contribui den e prome añanan di NoticiaCla, incluyendo webmaster Leopold Laclé, kende su trabou tabata fundamental pa crea tanto e website como e aplicacion mobil.

Awe nos ta mira bek riba un recorrido di 12 aña.

Un otro manera di celebra un aniversario

Normalmente mi ta marca e momentonan importante manera un lustro of dos lustro.

Ora NoticiaCla a cumpli cinco aña, nos a celebra cu cupcakes. Cinco aña despues, ora nos a yega diez aña, mi a produci un video cu diferente personahenan conoci cu durante e añanan a brinda nan apoyo na NoticiaCla.

E biaha aki, sinembargo, mi a dicidi pa haci algo diferente.

Na luga di simplemente celebra un aniversario, mi a dicidi pa haci di e fecha aki e comienzo di un capitulo nobo.

Mundo ta cambia mas lihe cu nunca. Tecnologia ta evoluciona constantemente. Lectornan ta spera otro cos. Tambe periodismo mes ta cambia.

P'esey mi a sinti cu e tabata e momento correcto no solamente pa celebra loke NoticiaCla a logra den 12 aña, sino mas importante ainda, pa prepara e plataforma pa loke ta bin.

Loke a cuminsa como un idea relativamente chikito — simplemente renoba e logo — poco poco a bira un proyecto hopi mas grandi.

Awe NoticiaCla no ta presenta solamente un identidad visual nobo, sino tambe dos idioma adicional: ingles y hulandes.

Ambos idioma ya tabatin un lugar den e plataforma algun tempo atras. Pero e tempo ey, nos simplemente no tabata cla pa sostene nan.

Awe si.

Y e biaha aki nan ta bin pa keda.

Durante un rato mi a considera pa introduci solamente ingles. E razon tabata relativamente logico: mayoria di personanan cu papia hulandes tambe ta compronde ingles, mientras cu normalmente esnan cu ta papia ingles so, no ta of por lesa hulandes.

Sinembargo, despues di scucha cuidadosamente diferente conseho y opinion, mi a dicidi pa reintegra hulandes tambe. Esaki ta duna nos contenido mas profundidad y credibilidad, y a la bez ta permiti nos alcanza un publico mucho mas amplio, tanto den Reino como afor di dje.

UN CAPITULO NOBO PA NOTICIACLA

E cambionan no ta limita solamente na idioma.

Nos a actualisa  e aplicacion mobil completamente y a reactiva diferente servicio cu tabata temporalmente fuera di uso. Ademas, nos a lansa e pagina oficial di Facebook pa tanto e version na ingles como e version na hulandes. E realidad ta cu hopi lector awendia ta sigui nan noticia principalmente riba social media.

E mesun  strategia ta wordo expande tambe riba Instagram, YouTube y otro plataformanan digital.

Hunto, tur e cambionan aki ta posiciona NoticiaCla no solamente pa awe, sino tambe pa e proximo añanan. Nos kier sigui evoluciona y keda prepara pa un mundo cu ta cambia constantemente.

INTELIGENCIA ARTIFICIAL COMO UN INSTRUMENTO, NO COMO UN REEMPLASO

No por papia di futuro di periodismo sin menciona inteligencia artificial.

Mescos cu hopi medio noticioso rond mundo, nos tambe a cuminsa incorpora AI den nos trabou diario.

Pero nos ta hacie cu un principio hopi cla: E periodista mester sigui tin e control.

Inteligencia artificial ta un instrumento poderoso. E ta yuda nos traha mas eficiente, produci mas contenido y brinda informacion mas rapido.

Pero AI nunca mester reemplasa e criterio periodistico, pensamento critico ni responsabilidad editorial. Na fin di cuenta, semper tin cu tin un persona cu ta tene e stuur den man. Y e responsabilidad ey ta bira aun mas grandi ora bo lema ta: "Noticia cu bo por confia."

Pa nos, e frase ey no ta solamente un slogan. E ta un compromiso. Un promesa cu nos ta haci na cada lector y cu nos kier honra tur dia.

ANALISIS TA BIRA UN PARTI PERMANENTE DI NOTICIACLA

Un desaroyo cu, pa mi mes, tabata un sorpresa agradable ta e popularidad creciente di e analisisnan cu mi a cuminsa publica regularmente.

Na principio nan tabata simplemente opinionnan ocasional, crea pa brinda contexto y splica loke tabata scondi tras di e titularnan di cada dia.

Nunca mi a pensa cu nan lo bira un di e producto mas aprecia di NoticiaCla.

Pero e lectornan a pensa diferente.

Demanda a sigui crece y awe analisis no ta simplemente un complemento den nos produccion periodistico. No. E ta un parti integral di identidad editorial di NoticiaCla.

Noticia ta conta kico a pasa.

Analisis ta purba splica pakico e a pasa, unda e desaroyo por bay y, talbez mas importante ainda, kico por wordo haci pa drecha loke no ta bay bon.

Den un mundo unda informacion ta move mas lihe cu nunca, pero comprension hopi biaha ta keda atras, contexto a bira un necesidad y no un luho.

P'esey, for di awe padilanti, e analisisnan lo aparece tambe den hulandes y ingles, permitiendo un publico mucho mas amplio participa den e conversacion tocante Aruba, Caribe y Reino Hulandes.

UN PLATAFORMA FORMA DOOR DI SU LECTORNAN

Probablemente bo mes ya a ripara cu e contenido di NoticiaCla a cambia durante e ultimo añanan.

Tin mas noticia.

Tin mas profundidad.

Tin mas variedad den e temanan cu nos ta cubri.

E evolucion aki no a pasa casualmente.

E la pasa pasobra abo, nos lector, y abo, nos comerciante, a haci bo bos tende.

Y nos a scucha.

Awe NoticiaCla ta drenta un fase nobo. Un fase construi riba ideanan nobo, tecnologia moderno y oportunidadnan nobo, pero sin laga atras e balornan cu a inspira su fundacion 12 aña pasa.

E logo a cambia.

Nos a amplia e idiomanan.

Nos tecnologia a modernisa.

Pero un cos no a cambia.

Nos mision ta mescos cu dia cu NoticiaCla a bay live: Brinda periodismo independiente, responsabel y digno di e confianza cu nos lectornan ta deposita den nos tur dia.

UN PALABRA DI GRADICIMENTO

Finalmente, mi kier expresa mi mas profundo gradicimento na dos grupo di persona. Promero, na abo, nos lector.

Bo ta sigui scoge NoticiaCla dia tras dia como un fuente di informacion. E confianza cu bo ta deposita den nos, nunca lo wordo considera algo normal. Al contrario, nos ta aprecia esaki cada dia.

Di dos, mi kier gradici nos comerciantenan y nos socionan comercial.

Nan confianza den nos trabou a haci posible pa NoticiaCla sigui crece, sigui inverti den miho periodismo, den tecnologia mas moderno y den un forma nobo di sirbi Aruba y un publico internacional cu ta sigui amplia.

Sin nan apoyo, hopi di loke nos ta presenta awe simplemente no lo tabata posible.

Diesdos aña pasa, NoticiaCla a cuminsa cu un idea relativamente simple: Brinda Aruba un medio independiente cu hende por confia.

Awe, nos ta habri un otro capitulo.

Un capitulo unda innovacion, calidad y credibilidad lo sigui guia tur loke nos haci, mientras cu nos mirada ta enfoca riba futuro.

Na tur persona cu durante e ultimo 12 aña a forma parti di e caminda aki, mi kier bisa:

DANKI DI CURASON.

Mi ta plenamente convenci cu e miho añanan di NoticiaCla ainda ta dilanti nos.