Aruba ta prepara pa cambio importante den pago internacional via Swift

ORANJESTAD – Banco Central di Aruba (CBA) a participa dialuna den e Swift Payments Experience Roadshow na Willemstad, un encuentro organiza door di Banco Central di Corsou y Sint Maarten (CBCS) pa prepara banconan di e region pa cambionan importante den sistema internacional di pago.

REGLANAN NOBO TA BIN

For di 14 di november 2026, Swift – e red mundial cu ta conecta banconan pa pago internacional – lo exigi cu tur transferencianan inclui informacion di direccion den un formato structura. Si e informacion no ta completo of no ta den e formato correcto, un pago por wordo retrasá of hasta rechazá. Esaki lo aplica tambe pa transaccionnan cu ta sali di Aruba of cu ta yega Aruba.

MAS TRANSPARENCIA PA CLIENTE

Swift tambe ta lansa un sistema nobo pa consumidornan y empresa chikito. E plataforma nobo lo ofrece mas claridad prome cu un pago wordo procesa, incluyendo costo, tasa di cambio, tempo di entrega y cuanto placa e receptor lo ricibi finalmente.

IMPORTANCIA PA ARUBA

Pa Aruba, e cambionan tin importancia special pasobra hopi pago internacional ta pasa door di banco corresponsal. Den Caribe, e relacionnan aki ya ta bou di presion pa motibo cu algun banco internacional ta corta nan cooperacion pa limita riesgo, un practica conoci como de-risking. Segun e experto nan, esaki por haci pago internacional bira mas dificil y por limita acceso na servicio financiero. Representantenan di banconan di Aruba, Corsou y Sint Maarten, hunto cu banco internacionalnan y Fintech Association di Corsou, a participa den e reunion. Durante e evento, representantenan di Swift a presenta nan vision estrategico y e cambionan cu lo drenta na vigor den Swift Standards Release 2026.