Corte na New York ta rechasa intento di ex presidente Maduro pa rechasa caso penal

NEW YORK – Nicolás Maduro a   presenta atrobe dilanti un huez federal na New York, unda su abogadonan   a purba pa stop e caso penal contra dje sin exito. E huez a decide cu e proceso lo sigui.

Ta trata di e di dos audiencia desde cu e ex lider Venezolano a wordo aresta na cuminsamento di januari. Maduro y su esposa Cilia Flores ta wordo persegui na Estados Unidos pa, entre otro, narcoterrorismo, trafico di droga y posesion di arma.

Durante e audiencia, defensa a purba elimina e acusacionnan. Segun e abogadonan, Maduro no ta haya un proceso husto, pasobra sancionnan americano ta impedi e pa usa fondo Venezolano pa paga su defensa.

E huez no a bay di acuerdo cu esaki y a rechasa e peticion pa cancela e caso. Cu esey, e proceso penal contra Maduro y Flores ta sigui y e caso lo continua.

Maduro mes ta sigui mantene cu e ta inocente y a describi su situacion como esun di un “prisonero di guera”.

Den e periodo cu ta bin, corte lo enfoca, entre otro, riba pregunta si y bou di cual condicion Maduro por haya acceso na medio financiero pa su defensa. Esaki ta move e foco di e caso pa un conflicto legal tocante sancionnan y derecho fundamental.

Maduro y Flores ta deteni desde nan arresto den un prizon na Brooklyn, sperando e siguiente paso den e proceso. NOTA: E potret ta un dramatisacion di e evento pa acompaña e texto.