Impuesto riba buelo no ta spanta biaheronan Hulandes

SCHIPHOL - E reintroduccion y despues aumento di e impuesto riba buelo no a hasi cu biaheronan Hulandes na masa ta cambia pa aeropuerto den otro pais. Tambe pasaheronan Aleman y Belga ta sigui usa aeropuerto Hulandes den mesun medida cu prome di pandemia. Esaki ta sali for di investigacion di Kennisinstituut voor Mobiliteitsbeleid (KiM), realisa na encargo di ministerio di Infraestructura y Maneho di Awa. E impuesto riba buelo (awor 30,25 euro) a wordo introduci na 2021. E idea cu biaheronan ta busca buelo mas barata over di frontera no ta confirma segun e investigacion. Mayoria grandi di Hulandesnan ainda ta sali for di aeropuerto den nan mesun pais. “No tin movimiento grandi den fluho di pasaheronan ni un salida masivo,” investigadornan a conclui.

PASAHERONAN

E numbernan di pasahero tambe no ta mustra desviacion grandi. Desaroyo di cantidad di biahero na aeropuerto Hulandes ta sigui casi igual cu esnan na Belgica y region di frontera na Alemania. Na 2019, prome cu impuesto riba buelo, Hulanda tabatin 81,2 miyon pasahero contra 80,6 miyon na otro banda di frontera. Na 2025 e numbernan a baha levemente pa 78,4 miyon (baha 3,4 porshento) y 76,2 miyon (baha 5,5 porshento).

MAS IMPUESTO RIBA BUELO LO BINI

E impuesto riba buelo lo subi mas e aña cu ta bini. For di 1 di januari 2027, lo wordo calcula segun distancia, cu lo hasi buelonan leu bira mas caro. En bes di un tarifa so (30,25 euro na 2026), lo tin tres tarifa:

+/- 30 euro pa buelonan corto (<2000 km)

+/- 47 euro pa distancia medio (2000–5500 km)

+/- 71 euro pa buelonan largo (>5500 km)

Loke ta yama atencion ta cu cinco aeropuerto Hulandes hunto ta procesa casi mesun cantidad di pasahero cu diesdos aeropuerto husto over di frontera. Unda cu e aeropuerto Hulandes tabata crece mas rapido te 2019, despues di pandemia y e impuesto, e diferencia aki awor a disparece.

DIFERENCIANAN REGIONAL

Tras di e cuadro general estable, tin diferencianan regional cla. Na Hulanda, crecemento ta bin principalmente di aeropuerto rond di Amsterdam, Rotterdam y Eindhoven, mientras Groningen y Maastricht ainda ta keda bou di nivel prome di corona. Na Belgica, especialmente Bruselas y Charleroi ta hala mas pasahero, mientras aeropuerto mas chikito ta keda atras. Na Alemania, e situacion ta mezcla: algun aeropuerto regional ta crece, pero esnan grandi ta keda atras.

MENOS BIAHERO DI NEGOSHI, MAS TURISTA

Composicion di biaheronan a cambia  structuralmente despues di pandemia. Cantidad di biahero di negoshi a baha, entre otro pa motibo di reunion digital. E crecemento ta bin casi completamente di turista. Esaki tin influencia riba sensibilidad pa prijs. Turistanan normalmente ta mas consiente di prijs y mas flexible den nan escoho di aeropuerto y destino cu biaheronan di negoshi. E leve aumento di Hulandesnan na aeropuerto manera Bruselas y Düsseldorf por parcialmente splica pa un disminucion di biaheronan di negoshi for di Belgica y Alemania.