Wever-Croes ta pidi claridad riba eliminacion di Departamento di Mucha y Hoben

ORANJESTAD – Parlamentario Evelyn Wever-Croes a presenta preguntanan parlamentario na ministro di Educacion tocante eliminacion di Departamento di Mucha y Hoben (DMH), e instancia cu tabata encarga cu supervision riba centronan di cuido di mucha na Aruba.

RAPPORT

E preguntanan a surgi despues di publicacion di e rapport di Ombudsman “Het Luisterend Oog – In kaart brengen van instellingen”, den cual, entre otro, ta menciona falta di claridad tocante supervision riba centronan di cuido di mucha y e rol cu DMH tabata cumpli den esaki.

SEGURIDAD Y BIENESTAR

Segun Wever-Croes, seguridad y bienestar di muchanan mester keda prioridad principal. Segun  e, centronan di cuido di mucha ta cumpli un rol importante den sociedad, y pa esey supervision riba esnan mester ta cla, fuerte y confiabel.

GOBIERNO ANTERIOR

Departamento di Mucha y Hoben a wordo establece den gobierno anterior cu meta di fortalece supervision riba centronan di cuido di mucha, incluyendo registro di e centronan y control riba cumplimiento di normanan legal.

PREOCUPACION

Wever-Croes ta considera preocupante cu e actual ministro di Educacion a decide elimina e servicio aki, segun dje sin un motibo cla ni sin anuncia un alternativa claro pa continua e supervision.

PREGUNTANAN

Den su preguntanan na ministro, Wever-Croes ta pidi aclaracion riba e base di e decision pa elimina DMH, cual experto of instancia a wordo consulta, ken actualmente ta responsabel pa supervision riba centronan di cuido di mucha y e registro nacional, y con lo wordo sigura cu e centronan ta cumpli cu normanan di calidad y seguridad.

Segun e parlamentario, supervision riba cuido di mucha no por wordo laga na casualidad. E ta spera cu gobierno lo duna pronto claridat na Parlamento y comunidad tocante con e supervision riba e sector aki ta wordo organiza y cual medidanan lo wordo tuma pa sigura proteccion di muchanan na Aruba.