Republica Dominicana y Aruba ta lidera e caminda: E Top 4 mihor destinonan di Caribe

MIAMI - Caribe ta sigui consolida su posicion como un di e regionnan preferi pa bishitantenan Chileno, cu su beachnan di awa cla, conectividad aereo y oferta orienta na relaxacion. Asina e portal travel2latam.com ta publica awe den un articulo. Segun e portal, Februari historicamente ta e luna cu mas bishita pa bishitantenan Chileno. Den pleno verano di Hemisferio Sur, Caribe ta un di e destinonan mas popular pa hui di calor, atrae pa su beachnan di santo blanco, awa turquesa y infrastructura turistico bon desaroya, diseña pa descanso. Segun Assist Card, un compania lider den asistencia di biahe cu mas di cinco decada di experiencia, cuatro destinonan di Caribe ta e mas popular entre Chileno durante e temporada di verano.

REPUBLICA DOMINICANA

E ta ocupa prome lugar den e ranking, cu Punta Cana como su porta principal. E destino ta combina conectividad aereo directo, un amplio gama di hotel y un perfil claramente internacional. Como alternativa, Bayahibe ta ofrece un opcion mas trankil, ideal pa biahenan familiar. Segun cifra di Junta di Aeronautica Civil, un total di 41.676 Chileno a biaha pa Republica Dominicana na 2025.

ARUBA

Conoci como “One Happy Island”, Aruba ta famoso pa su solo constante durante henter aña, beachnan di santo blanco y paisahenan exotico. Como parti di Reino di Hulanda, e tin un aeropuerto internacional na Oranjestad, situa na pocos minuut di zonanan turistico manera Palm Beach, un di e resortnan mas famoso di e isla.

PUERTO RICO

E archipielago di Caribe, un territorio no incorpora di Merca, ta conoci como “The Island of Enchantment”. Puerto Rico tin un costa diverso, cu beachnan iconico manera Flamenco Beach, Condado Beach y Luquillo Beach. E punto principal di yegada pa avion ta San Juan, for di unda conectividad interno ta wordo establece.

JAMAICA

E luga di origen di reggae ta completa e Top 4. Jamaica ta caracteriza pa su atmosfera relaxa y su identidad cultural fuerte. E principal puertonan aereo ta Montego Bay y Ocho Rios, dos di e area turistico mas desaroya di e pais, sin necesidad di pasa pa e capital.