Silvania: ‘Mi a retira pa evita un ruptura den MFK’

WILLEMSTAD – Ex-minister di Financien Javier Silvania a retira di manera consciente pa preveni un division interno den partido di gobierno MFK. Asina el a declara e siman aki den programa Moru Bondia. E opinionnan den fraccion di MFK tocante e funcionamento di Silvania tabata hopi dividi. Un mocion di desconfianza for di oposicion tabata amenasa pa forza e partido na un votacion habri, unda miembro di fraccion lo mester a mustra claramente nan posicion. “Si mi mester sacrifica mi mes pa e obhetivo mas grandi, esta pa conserva e unidad den e partido, e ora mi ta dispuesto pa haci esaki,” Silvania a bisa.

CONFLICTO CU LANDSONTVANGER

E retiro a sigui despues cu   un grabacion di audio di un conflicto entre Silvania y Landsontvanger Alfonso Trona a sali na cla.  Silvania a reconoce cu como minister el tabata mester controla su mes mihor. “Mi no mester a laga mi provoca. Mi a cay den trampa,” el a declara. No tur hende den partido tabata di opinion cu su actuacion tabata incorrecto, pero Silvania a bisa cu e  ta compronde e critica cu a surgi.

LARGO PERIODO SIN PRESENCIA

Despues di su salida riba 15 di october, Silvania a bira miembro di Staten. Como lijsttrekker y e candidato cu a ricibi mas voto personal di MFK – mas cu 18.000 voto – el a haya e posicion aki immediatamente. Despues di esaki, el a keda varios luna sin participa activamente den debate publico. El a describi e periodo aki como un “vacacion largo”, unda el tabata completamente aparta for di politica. Silvania no kier a drenta den otro posibel razon pa su retiro. Segun el, e capitulo aki ta cera, y el ta enfoca riba presente y futuro. Den e contexto aki, el a papia di un “proceso di sanacion” den partido. Conflictonan bieu no mester wordo habri atrobe.

NO TIN PLAN PA PARTIDO PROPIO

Silvania a enfatisa  cu e  no tin intencion di forma un partido propio. “Mi no ta bira un miembro independiente di Staten y mi no lo cuminsa cu un partido propio,” asina e politico di MFK a declara. Su lealtad ta keda cu e partido cu ainda tin e responsabilidad pa cumpli cu loke a promete e electorado.