Na Corsou, laman bruto na costa west a causa basta daño

WILLEMSTAD.- For di ayera Servisio Meteorológiko Kòrsou a emití Kódigo Hel pa laman brutu ku ta na vigor pa áreanan di kosta nort i wèst. E impakto antisipá ku por a mira na vários playa parti wèst di Kòrsou tabata resake i/òf bientu fuerte ku a kousa laman brutu na kosta. E situashon aki a kousa ola haltu, i na Playa Piskadó algun boto chikí a risibí daño. Tambe por a mira mesun situashon di laman brutu na Playa Kenepa i otro playanan na parti wèst di Kòrsou. laman brutu a bati e playanan aki i a laga piedra riba e playa. E situashon aki a kousa ku turistanan no por a disfrutá di nos playanan na parti wèst ayera, i probablemente si e situashon kontinuá awe tambe manera Servisio Meteorológiko ta pronostiká, no por muha ni pia.

Den e pronostiká di tempu ayera tardi, i ku ta bálido te awe djárason atardi 18:00, ta indiká ku kódigo hel ta keda na vigor. Esaki ta un mensahe di prekoushon pa laman brutu ta na vigor pa áreanan di kosta wèst di Kòrsou.

Situashon general: Un frente friu posishoná riba sektor wèst di Atlántiko ku tambe ta ekstendé mas pa sùit te riba parti nortwèst kontinente Suramerikano, aktualmente no ta move muchu den direkshon di islanan ABC. No opstante esaki, e fenómeno por produsí algun nubia ku áwaseru leve riba área di nos islanan. Ademas, dor ku e sistema frontal ta basta serka di nos, e maintanan tempran lo ta un poko mas fresku. Segun ku e frente friu move poko poko mas leu den laman Karibe, ta spera ku bientu lo bira mas fuerte, ku konsekuensia ku laman lo keda algu brutu. Kondishon di laman: Moderá riba laman habrí ku altura di olanan entre 1 i 1.5 meter (3 i 5 pia). Resake for di wèst ta afektando na e momento aki, área di kosta wèst na Kòrsou, ku olanan di 2.5 meter (8 pia). NOTA: Texto scirbi den papiamento fonetico di Corsou.