• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: E tsunami cu e pega pega a crea rond di musica carnavalesco

E desaroyo di siman pasa rond di musica di carnaval, specificamente Soca Monarch, a habri un mundo di discussion publico. Specificamente, riba e futuro di e genero aki, y con tin cu bay anda cu esaki den futuro. Pa esun cu no ta compronde kico mi kier men, laga mi ‘recapitula’ mas lihe possible. Durante e siman di preseleccion di cantante pa e anochi final di Soca Monarch (Antes conoci como nos Roadmarch), a surgi un situacion interesante. Un cantante cu tin casi 3 decada ta participa, sin exito, a crea un momentum cu su presentacion. E motibo? E la presenta un cancion simple, facil, y sin mucho beheit. E tema? Un pega pega cu ta haci zonido fastioso y ta cansa hende. E ta keke continuamente. E cantante mes, su cantamento no ta esun mas miho, pero esey no tabata e asunto awor. Su cancion a cende un chispa carnavalesco sinigual. Tur hende tabata papia riba dje. Companianan a cuminsa usa e imagen y tema pa propaganda nan producto, y asina tin mas cos. Pero ora cu e no a sali den e finalistanan, esaki a crea un ola fuerte di reaccion nacional. Pa scapa cara, e organisacion responsabel pa e evento, a purba crea un solucion ‘digno’. Crea un forma cu e pueblo por a scohe ‘nan’ faborito, y haci esaki via votacion riba red social (Facebook). Y aki, toch, for di porta di cushina, e participante cu su toteki, a drenta toch. Y, na final, e la sa di bay cu e premio maximo tambe!  

OK. E splicacion a dura un poco mas largo. Pero esaki ta e situacion. 

Awor e pregunta ta, kico mester haci awor pa futuro. Mientras cu e resultado awor ta gusta pa ‘tur’ hende, (mi ta sali for di e punto di bista cu mayoria grandi a sostene e resultado), e ta crea si un situacion cu mester di atencion. Mi mes tin mi pensamento, pero obviamente mi ta den minoria. Pero esey tambe mester por. 

HURADO

Con ta haci awor den futuro cu seleccion di hurado pa e evento aki. Hurado ta dificil pa haya caba. Y cu e acto aki, porta e la bira mas dificil aun pa haya un hende pa para hurado. Pakico? Si e organisacion por (via un regla inventa ultimo ora) laga un hende cu ‘no a cumpli cu regla di hurado inicialmente’, toch participa, kico esaki ta bisa di e integridad di e hurado inicial? E hurado inicial a ‘faya’ den su trabou?  Cu e cuerpo di hurado durante e anochi final, a sa di saca e mesun ‘ausente’ aki  despues como  ganador maximo, kier men cu e hurado a ‘bin bey’, a ‘cambia nan vision’? Of kico a pasa cu e hurado awor a cambia di pensamento? E polishmento di e cancion tabata asina dramatico, cu diripiente e la bira asina bon y/ awor si a cumpli cu e exigencianan pa cual e la faya anteriormente? Of ta e presion di publico a surpasa e regla di hurado? 

Un musico a sugeri cu kizas mester cambia e loke cu e hurado ta husgza, of e tipo di hurado cu mester pone. Esta, un hurado cu ta p.e. un bailador, cu tin scol di baile y cu ta husga e cancion si e ta uno cu e hurado lo usa den su scol di baile den futuro. Pues, legumain huzga pa voz, letra y otro cosnan cu awor e huradonan ta huzga, y husga simplemente riba e ritmo y si e ta pegahoso pa bailadornan?. Hopi a bisa cu ‘esaki no ta un festival di OTI (Festival grandi internacionalmente) , of otro unda cu voz y cancion ta lo mas importante, cu e vibe cu e cancion ta trece’. ‘Esaki ta carnaval, no OTI’, ta loke nan ta bisa.   

OFENSA

Pa un cantante estableci, cu tin bon tono, bon voz, entonacion y tur e otro rekisito di un cantante, e loke a sosode, por zona como un ofensa mayor loke a pasa aki. E por te hasta reconsidera su participacion proximo biaha. Djis wak pa bo cancion tin un kick cu e publico y bo ta cla. No worry si bo ta canta malo, basta bo publico pasa bon!. Hopi cantante por a pensa asina, y mesora e fanaticonan di e ganador a responde:’ Duna e persona humilde aki un chens! Hala un banda y bolbe otro aña. Pero e aña aki, ta pertenece na e ganador aki! Punto!’. Otro comentario cu mi a wak, ta bisa cu pa mucho tempo, a comercialisa y profesionalisa e evento aki. Y cu e cambio aki di e persona cu a gana, e la manda un señal cu mester bay bek na e base di e festival. Kico esaki kier men? Nos a bira mucho moderno? Nos mester bay bek estilo cauchi baulo? Con bek nos mester bay? Esaki tambe ta un discussion. No moderniza? No ta asina semper nos ta grita? Ta bolbe e discussion di tradicion versus modernisacion. Si bay bek na loke e tabata antes, no mester cambia tur cos, incluyendo e nomber, cu awor a bira Soca Monarch, y bay bek na yama e cos Calypso y Roadmarch contest?  Y laga mi añadi esaki: Antes e eleccion di reina tabatin tur e damitanan den bisti blanco, estilo miss Aruba y bo mester tabatin un figura popchi popchi. Awe esey a cambia. E figura no ta importante, y tampoco e color di bisti. Pues, aki tambe a evoluciona y modernisa. Esey TAMBE mester bay bek, na bisti blanco? 

 Of e cos di e aña aki tabata djis un ‘kick’, y cu pa otro aña tur hende a lubida y nos ta bek na saca nos hendenan di custumber? Whatever esey ta. Si ami tabata hurado, ami lo pensa dos biaha kico pa haci. Y si mi tabata cantante, tambe. Pero esey ta ami. Ami lo kier un claridad sigur, y concreto, prome cu mi pensa so di presta mi mes pa ta un hurado, of un participante. Y finalmente, pa keda positivo. Mescos cu ta critica cu pueblo mester wordo respeta, cu su escogencia, esnan cu a core usa e imagen, e cancion, e idea di e toteki, pa nan beneficio commercial, TAMBE mester pensa bon!. A core usa e imagen, e momentum, pa probecha pa bo logro commercial, sin pidi e doño di curpa. Esey tambe ta bon? A probecha di e persona cu no tabatin experiencia y no a logra ‘patenta’ su logro, pa evita comercialisacion masal di e idea di e toteki. Si, ami tambe a use como ilustracion, pero no comercialmente. Enfin, exito na tur cu tin cu bay deal cu e asunto aki, OTRO aña. Pa awor, goza di e toteki, e kekeke, y disfruta carnaval sanamente!