Gobernador den discurso di aña nobo: Ta spera cu situacion den region no escala

ORANJESTAD – Partnernan den Caribe y Hulanda ta tumando paso importante pa prepara nos planifica pa e crisis actual cu tin den region. Esey tabata parti di e mensahe di SE Gobernador di Aruba Alfonso Boekhoudt e siman aki na occasion di e recepcion di aña nobo annual. E discurso a cubri dos tema principal, esta e situacion den region relaciona cu Venezuela, y nos deseonan na comienso di cada aña y con pa logra esaki. Prome tabata e situacion den region. Manera cu gobernador a bisa, ‘e aña a cuminsa tambe di un forma completamente diferente’. “Cu accionnan militar na nos frontera pazuid, den e capital di Venezuela. Diripiente e menasa di violencia militar, cu pa un tempo largo nos a sinti ta crece, a bira concreto y visibel”. Segun Gobernador, aunke nos no por indica ainda kico e efectonan di termino largo lo ta di e accionnan mericano na Venezuela, sinembargo e suceso ta mustra cla cu algo a cambia den nos region. “Nos ta spera cu e situacion no ta escala, cu e partidonan ta tene nan mes na derecho international y cu por cuminsa cu un regreso na democracia na Venezuela”.

ENVOLVIMENTO DI ARUBA ?

Segun Gobernador, pa Aruba, mescos cu pa resto di e Reino Hulandes, ta conta cu nos no ta parti di e conflicto na Venezuela. P’esey no tin mencion di menasa concreto den direccion di Aruba. “ Tambe nos ta conta cu e proteccion di e forsanan militar Hulandes; e minister di Defensa tabata ayera ainda na Aruba, cual ta un señal importante. Na mes momento e acontesimentonan aki ta indica cu nos mester keda traha na planificacion di crisis y cu colaboracion ta necesario den esey, cu nos partnernan di e otro islanan Caribense y di Hulanda. Nos ta tumando algun paso importante den esey” Gobernador Boekhoudt a finalisa bisando riba e tema aki. Pa e discurso completo, click AKI.