Cas Blanco no ta exclui opcion militar pa haña Groenland

WASHINGTON – Presidente mericano Donald Trump y su ekipo ta discuti manera nan por haya Groenland. Esaki ta loque Cas Blanco a bisa despues di pregunta di agencia Reuters. “E presidente y su team ta discuti un cantidad di opcion pa logra e meta importante aki den polisa exterior,” segun Cas  Blanco. “Uso di forza militar ta semper un opcion.”

SEGURIDAD NACIONAL

Durante e prome simannan di su periodo, Trump a laga cla cu e ke tuma Groenland for di Dinamarca. Pero premier di Dinamarca, Frederiksen, y tambe mes Groenlandesnan, ta rechaza esaki duro. Trump, sinembargo, ta bolbe riba e idea constantemente, e ultimo bez domingo anochi riba su avion di gobierno. “Nos mester Groenland pa nos seguridad nacional,” Trump a bisa. “Su posicion ta estrategico. Na momento aki, tin barconan ruso y chines tur rond. Nos mester Groenland pa nos seguridad nacional y Dinamarca no lo cuida di dje, por cierto.”

SOSTEN PA DINAMARCA

Paisnan miembro di NAVO, incluyendo Hulanda, a mustra sosten pa Dinamarca awe. “Tocante futuro di Groenland, ta Dinamarca y Groenland mes mester tuma e desicion,” segun ministro di Asuntunan Externo Van Weel. Un fuente den gobierno di Merca a bisa na Reuters cu esaki no lo spamnta Trump. “Esaki no ta bai caminda.” Trump kier e plan wordo logra prome cu final di su periodo na cas.