Polis a detene 6 persona durante varios entrada hudicial y confisca arma y droga

SANTA CRUZ - December a habri y un racha di entradanan hudicial cu detencion a tuma lugar. Esaki den cuadro di un investigacion pisa cu Unit Narcotica a realisa a termina exitoso cu sla duro pa baho mundo. Asina polis a raporta diamars anochi.  Segun e raportahe pues, december a habri cu entrada hudicial na un percela den Bushiri pa bendemento di droga. Na Bushiri a detene un hende homber di inicial J.L.P. di 33 aña di edad y naci na Hulanda. Durante e buskeda a confisca arma di candela cu yen municion. Tambe a haya cargacion di marihuana y cocaina. Relaciona cu e mesun investigacion polis (Unit Narcotica) a sigui despues riba un otro dia, pa un otro entrada hudicial na un percela na Calbas, Pavia y Shiribana. A detene dos hende muher di inicial M.C.K. di 36 aña di edad naci na Aruba y C.M.R.P. di 42 aña di edad naci Republica Dominicana. Tambe a detene tres hende homber di inicial S.A.F. di 58 aña di edad naci na Aruba tambe un otro hende homber di inicial E.A.T. naci na Aruba di 45 aña di edad y A.J.L.L. naci na Aruba di 33 aña di edad. Durante buskeda na e percelanan aki a encontra un cantidad considerabel di marihuana y cocaine. A haci uzo di diferente teamnan di KPA manera; Team di aresto, K-9 Unit, Flexteam, RRT y polis uniforma di Noord.