Revision di LNT por crea problema ‘nobo’ entre Aruba y Hulanda

ORANJESTAD – Revisacion di e Landsverordening Normering Topinkomens Aruba, LNT por crea un problema ‘nobo’ entre gobierno di Hulanda y Aruba. Gobierno di Aruba na dos ocasion a confirma pa Noticiacla, cu nan intencion ta pa revisa e ley, mirando e embergadura y problema legal cu e ta creando. E problema ta, cu e ley ta un condicion imponi pa Hulanda, ora a fia Aruba placa tempo di pandemia. Minister Gerlien Croes a tuma nota di e reaccion aki di Hulanda diahuebs anochi den e programa Noticiacla LIVE, pero no ta kere cu e lo crea un problema. 

TRECE CAMBIO

Tanto minister Geofrey Wever como Gerlien Croes cada un a confirma pa e portal aki, separadamentek, cu a duna ‘opdracht’ na DWJZ (e organo huridico di gobierno) pa bin cu un revision den e ley. Motibo manera anuncia caba, ta e embergadura cu e ley aki ta trece pa Aruba, tanto financieramente como legalmente. Financieramente pasobra e contenido di e ley actual, ta stroba Aruba di haya directornan cualifica pa por dirigi companianan crucial. Pa por atrae directornan pa dirigi cierto companianan crucial, ta rekeri pa paga nan un suma di placa cuantioso. Pero e ley LNT ta netamente stroba esaki di sosode. Un ehempel bibo, ta e problema cu aeropuerto tabatin pa por sigura un director ‘cualifica’ pa por dirigi e aeropuerto. Gobierno di Aruba a desvia di e ley, pa asina toch por a logra haya un candidato. Esaki sinembargo ta crea un otro problema, ya cu otro companianan tambe kier e ‘excepcion ey’. Varios otro compania unda cu tin directornan cu a keda afecta, a hiba gobierno corte y a gana nan caso. Y segun minister Geofrey Wever, tin entre 12 pa 15 caso pendiente riba e tema ey den corte. Como tal, a dicidi na September caba, pa pidi DWJZ pa un revision di e ley, pa por acapara e problemanan aki. Pero, awor ta resulta cu e cambionan aki, lo por trece problema (atrobe) cu Hulanda. Atrobe, pasobra ta bira di dos biaha, cu Aruba ta ‘viola’ un acuerdo via un ley, door di haci cambio unilateral, manera cu a haci tempo cu dos parlamentario den pasado a ‘torno’ den e ley di LAFt cu a pone Hulanda perde confiansa y awor exigi un Rijkswet, pa asina evita cu den futuro, algo similar por sosode atrobe. 

LNT TA CONDICION DI HULANDA 

Diahuebs, Hulanda a confirma pa Noticiacla atrobe, cu LNT  tabata “ un condicion exigi pa Hulanda, pa ricibi ayuda di liquidez, pa cubri e consecuencia di pandemia Covid na e tempo ei”. Esaki e representante di e secretario di estado di Reino, a confirma pa e portal aki e siman aki ainda. Algo cu representantenan di gobierno hulandes a confirma na Noticiacla diahuebs ainda. Mientrastanto, inoficialmente, Hulanda no ta compronde pakico awor kier haci cambio, siendo cu e ley ta cla y aproba caba. Manera splica caba, e introduccion di e LNT tabata efectivamente un condicion di Hulanda, pa ricibi ayuda di liquidez, pa cubri e consecuencia di pandemia Covid na e tempo ei. Y textualmente, den discusion pa cu e Landspakketten, “LNT por wordo mira como un medida specifico cu ta cay bou e obhetivo amplio di reformacion di Landspakket, especialmente den area di manejo finansiero y sector publico. E ta parti di e esfuerzo pa controla costo di sector publico y pa mehora disciplina financiero”. 

PROBLEMA ENTRE HULANDA Y ARUBA

Tumando nota di e intencion di gobierno di Aruba pa ‘torno’ na e ley aki, Hulanda su prome reaccion no ta positivo y ta mustra cu esaki por crea un problema. Inoficialmente, e contesta ta ‘no’ pa cu e posibilidad pa trece cambio den e LNT, debi cu Hulanda ta considera cu e ta un ‘done deal’ caba cu Aruba, y cu no ta mira pakico mester bay bek riba esaki. Mientrastanto ta sperando riba un contesta ‘mas concreto’ di Hulanda awor riba e tema aki, cu por bira un problema. Esaki debi cu ta bira di dos biaha cu Hulanda ta haya un ‘sorpresa’ desagradabel di Aruba, cu ta haci cambio, di un forma unilateral. Minister Gerlien Croes, ora cu e la keda confronta cu e posibilidad cu Hulanda ‘por’ haci fastioso riba e tema aki, e la comenta den e programa, cu e no ta kere cu Hulanda ta bay haci fastioso. Y cu lo tin deliberacion cu Hulanda manera a bin ta haci caba. Ademas, segun sra Croes, huez den varios sentencia riba e caso di LNT tabata hopi cla y a indica caba cu legalmente, e structura di e ley manera cu e ta, no ta bon. Pues basa riba esaki tambe, Croes ta haya ta necesario pa adapta e ley.