Paro di fuego den Gaza a cuminza, Palestinonan ta bolbe cas

GAZA -  Den Gaza, e paro di fuego a cuminza oficialmente. Esaki a tuma luga medio dia ora local, 11 ora den Hulanda, despues cu e ehercito Israeli a cuminza su retiro segun e acuerdo cu Hamas. “Desde medio dia nos tropanan a posiciona nan mes riba e linea di desplegamento actualisa, den conformidad cu e punto principalnan di e paro di fuego y e acuerdo referente na entrega di e rehennan,” segun un comunicado di e ehercito. Premier Israeli Netanyahu a nombra e desaroyonan den un discurso cu a wordo transmite mundialmente riba canalnan di television, llamando esaki un victoria pa su pais. Segun el, e retiro di e ehercito y e liberacion di tur rehennan no tabata posible prome, pasobra Hamas solamente awor “a ricibi e cuchillo na su garganta.”

AGRADECIMIENTO NA TRUMP

Netanyahu a gradici den su discurso e militar nan “cu a proteha nos pais” y tambe a expresa su agradecimiento na presidente Mericano Trump, cu segun Netanyahu “a mustra liderato y grandeza.” Netanyahu a menciona tambe e negociadornan Mericano Steve Witkoff y Jared Kushner den su palabra di agradecimiento. Netanyahu a bisa cu e rehennan Israeli cu ainda ta den man di Hamas lo bolbe den e dianan cu ta bin. Segun e acuerdo, Hamas lo libera tur rehennan den 72 ora, y di esnan, veinte ta considera cu ainda ta biba. No ta conoce cuantu lo wordo libera y na ki momento presis.

TROPANAN TA KEDA

Netanyahu tambe a bisa cu e ehercito Israeli lo keda den Gaza pa awor. E no ta wordo totalment retira, ni den e segunda fase di e acuerdo, pa mantene presion riba Hamas pa desarma su mes.