Israel y Hamas ta yega na prome fase di acuerdo: rehennan liber, ehercito ta retira

WASHINGTON -  Israel y Hamas a logra un acuerdo riba e prome fase di un paro di fuego den Faha di Gaza. Esaki ta wordo confirma pa Merca, Israel, Hamas y mediador Qatar. Presidente Mericano Trump a anuncia rond di 1 di madruga e cu el ta yama “acuerdo historico” riba su medio social Truth Social. El a bisa cu tur rehennan “lo wordo libera hopi lihe.”

Agencia di notisia AP y CNN ta informa cu e binti rehennan cu ainda ta biba lo wordo libera pa Hamas durante e fin di siman. Israel ta spera cu esaki lo pasa diasabra, segun un portavoz di gobierno a bisa na agencia Reuters. Trump mes a bisa na Fox News cu e liberacion probablemente lo pasa dia lunes y cu den mesun momento tambe lo wordo entrega e curpanan di e rehennan cu a muri.

Trump a agrega cu Israel lo retira su tropanan “te na un linea cu a wordo conveni.” Aun no tin mas detaye riba esaki. E ehercito Israeli a declara cu e ta preparando pa tur scenario posibel tokante e operacion pa regresa e rehennan.