St. Maarten riba alerta pa tormenta tropical Jerry

W’STAD/PHILIPSBURG – Autoridadnan na St. Maarten ta urgi cuidadanonan di e isla pa sigui progreso di tormenta tropical Jerry di aserca. Jerry a forma for di diaranson mainta y ta e di 10 tormenta cu ta haya nomber durante e temporada di horcan Atlantico 2025 cu tin potencial pa desaroya y bira un horcan.

Segun servicio meteorologico di St. Maarten, for di diaranson 7 di october 5 ora di despues, e isla ta bou di un ‘tropical storm watch’, loke ta nifica cu tin posibilidad cu e isla por sinti consecuencia di un tormenta tropical den 48 ora. Jerry ta move den direccion west noordwest cu un velocidad di 30 kilometer pa ora y ta anticipa cu e sistema lo sigui den mes direccion den e dianan cu ta bin.

Ta pronostica cu e centro di e tormenta lo pasa rond di 130 milla noordost di St. Maarten den cacho di awetardi diahuebs pa diabierne. Forsa maximo di biento ta rond di 100 kilometer pa ora cu rafaganan mas fuerte. E bientonan cu forsa di un tormenta tropical ta extende te cu 205 kilometer for di centro di e sistema.

Ta anticipa cu Jerry lo produci entre 5 pa 10 centimeter di awacero acompaña pa bos cu biento. Esaki por causa inondacion den cierto area y caida di piedra y baranca for di seronan. Tambe ta anticipa cu poko poko pero sigur condicion di laman lo deteriora. Lo saca advertencia pa laman bruto y olanan halto si esaki bira necesario.