Minister Hulandes: tur tankero ‘di Aruba y Corsou’ ta fraudulento den flotanan sombra

DEN HAAG – Minister hulandes Van Weel di Asuntonan di Exterior ta bisa cu tur tankero cu ta nabega actual cu bandera y certificado di barco Arubiano of Corsou, ta fraudulento. Segun e, no tin absolutamente ni un tankero registra oficial den e registro di barco di Corsou of Aruba. Esaki ta confirma cu decenan di barconan den flotanan sombranan Ruso ta haci uso falso di banderan di Reino. Van Weel a responde pregunta den Parlamento di Hulanda for di parlamentario Paternotte y Boswijk, na motibo di un articulo di Follow the Money. Den esaki tabata describi con tankero Ruso bou bandera di Aruba, Corsou of Sint-Maarten ta intenta evita sancionnan internacional. Minister ta bisa cu esaki ta “hopi no desea” y e ta enfatisa cu Hulanda, hunto cu partnernan Europeo, ta trahando riba medida mas stricto, manera prohibicion di porto pa barconan individual.

SERVICIO DI SEGURIDAD

Servicio di Seguridad Corsou (VDC) a reporta den nan report anual 2024 cu segun nan tin por lo menos binti barco cu a  usa bandera di Corsou falsamente. Cu esaki Corsou a ocupa luga seis mundial den lista di bandera mas abusa. Segun VDC, hopi biaha e ta trata di barconan cu tin relacion cu transferimento di petroleo Irani cu ta bao sancion. Servicio a adverti tambe cu algun companianan di barco tras di e barconan tin relacion cu grupo terrorista.

Guardacosta a tene contacto den augustus cu dos barco cu tabata nabega bou un bandera Arubiano falso. Nan a pidi documentacion di barco y a bisa capitanan di nan responsabilidad pa siguransa di e navegacion.

Despues, e barconan a wordo acompana parti di nan ruta den Zona Economico Exclusivo di Hulanda. Gobiernu ta investigando awor medida adicional, manera inspeccion di barconan cu ta nabega bou bandera no-existente di Reino.