Corsou ta enfrenta Trinidad awe den clasificatorio pa Mundial Futbol 2026

PORT OF SPAIN – Awe 8or di anochi seleccion di Corsou lo topa cu Trinidad & Tobago. Na Corsou tin hopi espectativa pa e partido aki, cu ta valido pa e ultimo buelta di clasificacion pa Mundial. Mientras tur hende ta na espectativa tambe, ta keda e pregunta ken lo ta e titularnan pa Dick Advocaat awe nochi. Deporte EXTRA ta trece algun aliniacion cu posiblemente Advocaat lo por decidí pa uza awe. Haciendo uzo di sistema 4-2-3-1 cu e entrenador di seleccion a uza gran parti di su trayecto cu seleccion.

CUMINZA CU CASI TUR REFUERSONAN

Den e posibilidad aki Advocaat ta opta pa integra mesora casi tur refuersonan den e aliniacion. Den e caso aki ta trata di Shurandy Sambo, Riechedly Bazoer, Tahith Chong i Tyrese Noslin. Esaki obviamente cu algun ya establece den seleccion. Den gol ta stima Eloy Room. Shurandy Sambo lo ta defensa banda drechi, Sherel Floranus banda robes manera ta custumber, mientras Riechedly Bazoer hunto cu Roshon van Eijma den curazon di defensa. Den mei mei ta Juninho Bacuna huntu cu su ruman Leandro Bacuna. Net dilanti nan, na posishon di “10”, lo ta Tahith Chong. Riba e dos banda di atake lo tin Jeremy Antonisse i Tyrese Noslin. Mientras manera delantero central lo ta Jürgen Locadia.

COMBINA HUNGADONAN ESTABLECE CU ALGUN CARA NOBO

Den e posibilidad aki unicamente Shurandy Sambo i Riechedly Bazoer lo ta e refuersonan cu lo cuminza . Caminda Chong lo no cuminza hunga mirando cu el a bin recientemente for di lesion, y Advocaat lo spaar e pa e wega contra Bermuda. E ora ei, na luga di Chong lo drenta Livano Comenencia banda di Leandro, y asina Juninho Bacuna lo bai hunga na posishon di “10”. Mientras na luga di Tyrese Noslin lo drenta Jearl Margaritha.

CHONG RIBA BANDA HUNTU CU E TRES BOLANTENAN DI CUSTUMBER

Otro posibilidad cu ta existi ta cu Tahith Chong por cuminza manera un atakante riba banda, cual lo pone Leandro Bacuna, Livano Comenencia i Juninho Bacuna manera ta costumbre den bolante pa seleccion di Corsou.