Na Corsou, caso di ex parlamentario Lo Martines lo ta den corte diaranson

WILLEMSTAD - Djárason awor  e kaso kontra di e lider polítiko di partido KEM, Michelangelo “Lo” Martines lo keda trata integralmente den sala di korte. Esaki despues ku e kaso a bin dilanti pro forma  na dos okashon. Fiskal di Ministerio Públiko tin sinku akusashon kontra di Lo Martines. Kual ta transporte di 20 kilo di kokaina pa medio di un mula den periodo di 29 di novèmber 2019 te ku 16 di desèmber 2019. Segun e akusashon Lo a hasi esaki via di Kòrsou, Panama, Hulanda i Spaña; e di dos akusashon ta ku den periodo di 19 di febrüari 2020 te ku 22 di febrüari 2020 na Kòrsou, Panama òf Bèlgika el a transportá, prepará òf a negoshá 100 kilo di kokaina; di tres akusashon ta ku den periodo di 24 di novèmber 2019 te ku 25 di ougùstùs 2020 Lo a transportá negoshá òf prepará transporte di un kantidat di droga for di Kòrsou, Amsterdam, Panama, Fransia, Bèlgika òf Repúblika Dominikana; den 1 di yüli 2023 te ku 1 di ougùstùs 2023, el a regla otro transporte atrobe via di Kòrsou, Repúblika Dominikana, Panama  i Hulanda. E último akusashonnan ta di periodo di 1 di yanüari 2019 te ku 4 di novèmber 2024 via di Kòrsou, Panama, Hulanda i Repúblika Dominikana  el a laba sumanan di plaka di 1 mion euro/NAf òf USD; 110 mil euro, NAf i USD, 200 mil euro/Naf òf USD i tambe e sumanan di 25.900 i 35.000 respektivamente USD i euro.

Durante e kaso di pro forma anterior  Ministerio públiko a duna di konos’é ku nan a  kuminsá investigashon kontra di Lo Martines na momentu ku a haña informashon di e sistema di Skype. For di òktober 2023 a start ku investigashon. A tuma nota ku un dje kuentanan di Skype ta ser usá dor di Lo Martines, i tambe por skucha su bos. “Ta papia konstantemente di Lo, Lo, Lo i tambe di kampaña polítiko. Tambe ta papia di sintamentu di kastigu den pasado, kual a sosodé ku Lo Martines tambe”, segun fiskal. Ademas den su telefòn a topa kòmbersashonnan ku ta relashoná ku e informashonnan di e kuenta di Skype. Fiskal a sigui bisa ku pa transporte di droga bo no mester ta den e pais enkuestion unda e kos ta tuma lugá. Un dje transportenan a tuma lugá dia 19 desèmber 2019 via di Schiphol. Ta trata di 20 kilo di kokaina den maleta ku a gara serka e mula di fam Lak. Pe transporte aki, Lo tabata komuniká via di Skype i tambe via di su telefòn ku Lak. Ta basta interkambio tin entre Lo i e Lak riba e transporte aki.Hasta t’asina ku Lak tabata den hospital na Bogotá  i Lo a bishit’é. Riba e kuenta di Skype, Lo ta papia di hopi transporte, kon mester paga etc. tambe reglamentu di e transportenan. Mas aleu fiskal a bisa ku den telefòn di Lo, tin hopi vidio di plaka kèsh. Algun dje sènnan aki tin nòmber riba nan, i otro no. Fiskal a duna un ehèmpel ku riba un dje vidionan ku ta mira bastante plaka kèsh tin nòmber di Lo i un tal Deny pone. Tambe tin kòmbersashon di un transporte ku a bai robes i mester  paga bèk alrededor di 1 mion peso. Fiskal a sigui bisa ku den medionan di komunikashon masha kos tin skirbi, pero OM no ta bai reakshoná riba esakinan. OM a desbaratá e asuntu di falsifiká prosèsverbal ora ku a hasi konfushon ku e mula Lak i Mutueel. Di akuerdo ku fiskal, asina a mira e fayo a korigié, pero e fayo aki no tin ningun influensia riba tur e pruebanan ku tin riba mesa di Skype. Otro punto ku fiskal a bari for di mesa ta ku e kaso aki tin di aber ku polítika. Fiskal a bisa ku transporte di droga no tin nada di aber ku polítika. Simplemente Lo tabata un parlamentario i esaki no ta hasi ku e kaso ta unu polítiko. A topa telefònnan di Lo ku e ke a kibra, pero OM a logra di drecha esakinan pa e investigashon. Pues djárason binidero e kaso lo keda trata den su kontenido pa mitar di 10  di mainta kaminda abogadonan Vaders i Sulvaran lo hiba e defensa. NOTA: Texto ta scirbi den Papiamento fonetico di Corsou.