OM: Ta persigui dos polis cu a tira e hoben Lannoy mata, pa complicidad di homicidio

ORANJESTAD - Ministerio Publico ta persigui e dos polisnan cu a tira e hoben Lannoy mata, pa complicidad di homicidio. Asina Ministerio Publico a informa diabierna atardi. Na april ultimo, Ministerio Publico a informa caba cu lo a bay persigui e polisnan. Pero no a bisa cu kico. Awe den e investigacion penal di e tiroteo di 9 di februari 2025 den cual A.C. Lanoy di 19 aña a fayece pa motibo di un tiro di polis, e dos agentenan policial envolvi a bolbe wordo scucha como sospechoso. E caso a haya e nomber di Caret. Asina Ministerio Publico a informa. Despues di e interogacionnan aki, e ultimo actividadnan di investigacion lo tuma lugar y e investigacion finalisa. Ministerio Publico a anuncia anteriormente cu ambos agente policial lo wordo persigui penalmente. Nan lo wordo acusa di complicidad di homicidio.  

Landsrecherche ta trahando actualmente na compilacion di e dossier final. Asina cu esaki keda cla, e lo wordo entrega na Ministerio Publico. 

E asina yama ‘regiezitting’ den e caso ta programa pa diabierna 7 di november 2025. Durante e tratamento aki den Corte, e abogadonan di e sospechosonan lo haya oportunidad pa presenta nan deseonan di investigacion. Corte lo dicidi siguientemente cualnan lo keda admiti.

Tanto e abogadonan di e sospechosonan como e abogado di e famia di e victima fayeci a ser poni na haltura awe tocante e avance den e caso. Pa motibo di e seriedad di e incidente den cual un joven a fayece, e investigacion aki a wordo trata cu prioridad dor di Landsrecherche. Na mesun momento e falta di recurso durante hopi anja dor di falta di placa, ta causa cu otro investigacionnan andando a confronta tardanza. Potret cortesia Max Ng