OM: Corte a nenga peticionnan di Mike de Meza

ORANJESTAD - Hues a dicta awe relaciona cu e peticionnan cu Mike de Meza a entrega algun dia pasa na Corte den Prome Instancia. 

Den e peticionnan aki, basa riba articulo 43 di Codico di Procedimiento Penal, Mike de Meza a pidi Hues pa obliga Ministerio Publico pa dun’e mas informacion tocante e tipo y e motibo di e acusacionnan contra dje, y ademas pa Ministerio Publico tuma un decision di persecucion penal den su caso prome cu 15 di augustus 2025.

Hues a rechasa e peticionnan di Mike de Meza. Segun hues, Ministerio Publico a cumpli cu e decision di Corte di 25 di juni 2025, dor di informa Mike de Meza (riba e mes fecha aki) cu e ta sospechoso den un investigacion cu tin andando y dor di pon’e na haltura di e articulo den ley riba cual e sospecho contra dje ta basa. E peticion pa obliga Ministerio Publico pa dicidi prome cu 15 di augustus 2025 si Mike de Meza lo wordo persigui penalmente of no, hues a bisa di ta considera prematuro.