Venezuela a celebra 214 aña di independencia na Aruba

ORANJESTAD - Diasabra ultimo a tene un ceremonia di homenahe floral na honor di e Tata di Patria Venezolano, Simón Bolívar, hunto cu e Cuerpo Consular acredita na Aruba, conciudadanonan, y amigonan di e pais Suramericano riba e isla Caribense. E Vice Consul General di Venezuela, Ambel Lugo Irizarry, a transmiti e compromiso di e gobierno revolucionario di Presidente Nicolás Maduro pa sigui cu e lucha pa independencia y paz.

E ceremonia a cuminsa cu canto di e himnonan nacional di Hulanda, Aruba, y Venezuela, y ponemento di krans na pia di e busto di e Libertador Simón Bolívar.

Den su discurso e Vice Consul General di Venezuela, Ambel Lugo Irizarry, a transmiti e compromiso di e gobierno revolucionario di Presidente Nicolás Maduro pa sigui cu e lucha pa independencia y paz.

Den su remarcanan, el’a reflexiona riba e contexto mundial y e reafirmacion di e hefe di estado Venezolano di e necesidad urgente pa convoca un Cumbre Mundial pa Paz y Contra Guera, enfrente di e guera cu ta escalando.

E autoridad consular a enfatisa cu Venezuela, apesar di e medidanan coercitivo unilateral impone pa e imperio di Merca y algun elite Europeo, ta keda pacifico, harmonioso y victorioso, mescos cu e tabata pa 200 aña.