Koolman (WEB): Fayo di 2 motor a causa blackout diasabra merdia

ORANJESTAD – Fayo di 2 motor a causa blackout diasabra merdia ultimo. Por lo menos asina e CEO di WEB Aruba NV, Alfredo Koolman a declara diadomingo. Segun Koolman, alrededor di 12:15 PM, dia 5 di juli ultimo, a surgi un fayo den planta na WEB, cual a conduci na un Black out, un interupcion di coriente pa nos isla completo. Personal di WEB mesora a drenta accion pa isola e causa pa por recupera coriente mas pronto posibel. E proceso aki mester a bay hopi controla pa e planta no cay atrobe, mirando e situacion delicado. Pa 06:00 PM a logra reestablece suministro di coriente 100% pa ELMAR y consecuentemente ELMAR por a recobra e suministro pa nos isla henter.

INVESTIGACION PRELIMINAR

Segun investigacion preliminar e causa di e blackout ta fayo di dos motor RECIP cual a causa un desbalance grandi den e sistema di suministro. Consecuentemente e sistema di ‘load shedding’ cual ta desconecta areanan di demanda halto na e momento ey, no a funciona corectamente. Un investigacion mas produndo lo mester mustra kico a causa e fayo di e dos motornan.

FAYO DESCUBRI

Despues cu a descubri e fayo y cu a logra controla esaki, a cuminsa recupera suministro di coriente alrededor di 2:00 PM pa prome areanan. E secuencia den recuperacion di suministro di coriente pa e diferente areanan ta depende di stabilidad di e red di coriente y demanda di coriente na e momento ey. Tambe ta duna prioridad na suministro di coriente pa areanan di aeropuerto, hospital y IMSAN pa motibo di nan importancia vital pa nos isla. Alrededor di 3:40 PM un motor a ‘trip’ di nobo, cual atrobe a conduci na interupcion limita di coriente den areanan cu na e momento tawatin coriente caba. Pa 06:00 PM ekipo di produccion di WEB a logra reestablece coriente completo na e substacionnan di ELMAR rond Aruba. 

SUMINISTRO DI AWA

E blackout a afecta e suministro di awa tambe pa algun bario. Ta asina cu tin algun area, caminda awa ta wordo suministra por medio di pompnan cu ta traha riba coriente. Consecuentemente e falta di coriente a conduci na un bahada di presion di awa den e areanan. 

DISCULPA

Y manera a bira custumber, e disculpa publico no por a keda afo. “Di parti di gerencia y empleadonan di WEB Aruba, ta ofrece disculpa pa e inconveniencia causa pa e black out di 5 di juli, cual a logra recupera den un periodo di 5 ora y 45 minuut. Empleadonan di WEB su departamentonan di produccion di coriente y awa, pero tambe esnan di sectornan di mantencion, di asuntonan tecnico, di distribucion di awa y departamento di comunicacion, tur a haci nan maximo esfuerso pa a limita e tempo di black out mas tanto posibel y pa mantene comunidad informa. Un biaha mas WEB su gradicimento pa e comprension y pasenshi” Koolman a finalisa bisando.