Jeon ta kibra silencio riba impasse cu Kenley Jansen

ORANJESTAD – “Nos ta produci musica y no enemistad”. Asina e artista Jonathan ‘Jeon Arvani’ Thiel, a inicia su comunicado den cual e ta splica e impasse cu a surgi entre e y e conocido pelotero y promotor di Corsou, Kenley Jansen. Jansen e siman aki a sorprende hopi durante un entrevista unda cu e la anuncia cu e ta stop contribucion cu varios artista incluyendo Jeon, y e banda ICONS di Corsou.

ACLARIA

“ Nos kier tuma e momento aki pa duna claridad riba e situacion lamentabel cu a surgi den publico entre Jeon y KJ74 Entertainment, di Kenley Jansen” e comunicado ta cuminsa bisa. “ Na inicio di aña 2025, a yega un acuerdo entre Jeon y KJ74 pa un total di 10 show: 5 na Corsou y 5 na Hulanda (exclusivo). E termino di e contract tabata hopi cla: un 50% deposito pa cada pais, cu e resto pa paga prome cu cada show. KJ74 a paga e 50% pa e shownan na Corsou, pero a pidi pa pospone e pago di e shownan na Hulanda, prome pa un luna, despues varios bes pa mas tempo. Basa riba e confiansa y e relacion profesional cu ya tabata existi, Jeon a mustra flexibilidad durante varios luna” Jeon ta bisa den e comunicado. Pero aparentemente Jansen, lo no a paga e otro parti, cu a crea e problema pa Jeon. 

FALTA DI PAGO

“Despues di cinco luna sin pago y sin por tuma otro show exclusivo pa Hulanda, Jeon a indica cu esaki no tabata husto pa su carrera y a tuma e desicion pa retira su compromiso pa e shownan na Hulanda”. Jeon ta sigui bisa.TENSION

“Lamentablemente, esaki a crea tension den e relacion cu KJ74. Ta compronde cu Kenley Jansen tambe a sinti su mes molestia, pero e realidad ta cu tabata existi un acuerdo y e no a cumpli cu e termino acorda” Jeon ta continua bisando den e comunicado.

KICO AWOR?

Segun Jeon, e kier sigui cu comportacion respetuoso pa tur partido envolvi, pero tambe ta importante pa tin claridad riba e situacion. Jeon ta gradici pa e colaboracion cu KJ74 y ta desea pa mantene e respet mutuo, tur ora cu ta posibel.

MUSICA ENVEZ DI ENEMISTAD

Na final, Jeon ta bisa cu e no ta kere den violencia y semper y cuando a boga pa uni e islanan door di musica. Ta pidi pa tur hende keda trankil y na paz cu otro. “Nos ta crea musica. No enemistad”. Un biaha mas, ta pidi disculpa na tur fanatico si e situacion aki por a causa un impasse durante e ultimo dianan. Te aki e comunicado.