Relato annual di ATA: Turismo di Aruba a conoce crecemento di 13%

ORANJESTAD -  Aruba Tourism Authority (A.T.A.) recientemente a entrega su cuenta anual, audita pa un accountant, na Minister di Turismo, Transporte y Labor, mr. Wendrick Cicilia, cumpliendo asina cu e reglanan vigente. E cuenta anual ta refleha un aña record di crecemento y di trabou duro pa sigui desaroya, innova y balansa nos turismo, siendo e unico pilar economico di nos pais. For di aña 2011 cu Aruba Tourism Authority (A.T.A.) a bira un entidad autonomo, tur aña sigui a cumpli cabalmente cu entregamento di nan cuenta anual audita na tempo, den luna di maart (no mas tarda cu promer di april) di e aña siguiente. E rapport di aña 2024 ta refleha un gran logro, inovacion y compromiso fuerte cu un futuro sostenibel pa Aruba.

TURISMO A CRECE CU 13%

E Rapport Anual 2024 ta destaca e crecemento constante di turismo riba nos isla, cu 1.42 miyon huespednan ‘stayover’, cu ta representa un aumento di 13% compara cu aña 2023 y un nivel sobresaliente di satisfaccion di huesped cu un promedio di 9 punto di e 10 nan disponibel pa por husga. E logro aki a contribui na un ingreso di Afl. 5.4 biyon (pendiente cifra final di Banco Central), cu a traduci na e cifra di entrada di mas halto desde aña 2011 cu A.T.A. a nace como un entidad sui generis, como tambe aña record pa Aruba su turismo. Den un contexto global di cambio economico y preocupacion encuanto sostenibilidad, Aruba a sobresalí como un lider den Caribe, apostando fuerte riba turismo di High-Value / Low-Impact y orientando su strategia pa un futuro regenerativo.

KIER CRECE RESPONSABLEMENTE

“Cada aña ta trece su reto, pero tambe tin oportunidad. E Rapport Anual 2024 ta refleha e determinacion pa continua cu crecemento na un manera responsabel, proteha nos comunidad y medio ambiente, y fortalece e prosperidad di Aruba pa futuro generacionnan. Cu strategia Multi Annual Corporativo (yama: MACS 2025-2035), nos ta enfoca na locual cu Aruba por ofrece na su huespednan, pero tambe kico nos huespednan por duna bek na Aruba. Esaki ta refleha sigur den entre otro e campaña di comunicacion internacional cu a lansa siman pasa esta ‘When You Love Aruba, It Loves You Back’.” tabata palabranan di Ronella Croes, Chief Executive Officer (CEO) di A.T.A.

UN AÑA DI LOGRO

A.T.A. a enfoca den aña 2024 tambe riba produccion di su di cuater plan di maneho multi-anual (MACS 2025-2035) pa cual a delinea mas cu 100 accion pa diferente actor banda di A.T.A. pa e periodo te cu aña 2030. Accionnan cu ta inclui den e “Position Paper” ‘Turismo 2030. Un Aruba dushi pa Biba y pa Bishita’. Diferente investigacion a forma parti di e base pa delinea e direccion, entre otro un estudio enfoca riba “Local Sentiment”, pero tambe “Visitor Sentiment”.

Desaroyo di turismo regenerativo, enfocando riba conservacion di naturalesa y bienestar di e comunidad. Instalacion di sensor den luganan turistico pa crea un miho maneho y optimalisa e fluho di huespednan pa yuda proteha e recursonan natural. No por lubida inversionnan cuantioso den e pruducto mes, manera renoba y embeyece e area rond di Baby Beach. Creacion di campañanan global manera “The Aruba Effect” y “Relaxathon” cu a pusha e marca Aruba aun mas ariba den e mercado internacional. Reforsa colaboracion publico-priva pa garantisa un industria di turismo diversifica y inclusivo. Tur a ricibi atencion di 2024.

MAS TRANSPARENCIA

A.T.A. a prepara y a entrega un rapport na conformidad cu e "Landsverordening instelling A.T.A. Sui Generis" pa continua cu un proceso di transparencia y dunamento di cuenta, incluyendo revision y aprobacion di e Hunta di Supervision. Di e forma aki Gobierno di Aruba y despues tambe Parlamento di Aruba, tin un bista cla y transparente di e entradanan cu A.T.A a conta cu ne aña pasa y tur e esfuersonan di promocion cu a haci y cu a conduci na e crecemento di 13% den cantidad di turista, mas ainda e crecemento di e entradanan cu turismo a produci pa henter nos economia, aki ta calcula cu e “Tourism Receipts” lo por refleha un crecemento di 16% compara cu 2023. A.T.A. su entrada anual a surpasa e meta stipula y 91% di e presupuesto stipula pa mercadeo a wordo usa.