- Corsou a keda selecta den grupo E, cu Alemania, Ecuador y Costa di Marfil pa mundial 2026
- Debi na crisis den region, prome minister di Corsou, Pisas tambe a cancela biahe pa Hulanda
- Sorteo mundial di futbol: Hulanda contra Japon, Tunez y un otro campion di play-off cu ainda no ta conoci
- Corte a dicidi: Dos ‘spiritonan’ den caso Flamingo mester paga placa bek
- Copa Airlines y Wingo tambe ta suspende vuelo pa Caracas
OM: Lo persigui e dos agentenan policial cu a tira hoben Lanoy mata
ORANJESTAD - Ministerio Publico diabierna atardi a informa cu a dicidi pa persigui e dos agentenan policial envolvi den e caso di tiramento di e hoben Lannoy cu a fayece a consencuencia di e tiramento. E dos agentenan policial lo wordo cita pa responsabilisa nan mes dilanti hues. Nan lo wordo acusa primariamente di ta complice di homicidio.
E CASO
Tabata den mainta di 9 di februari 2025 un tiroteo a tuma lugar, den cual e homber hoben A.C. Lanoy (19 aña) a wordo alcanza pa un bala di polis y a bin na fayece. Esaki a hiba na gran emocion y dolor cerca su famia y den comunidad di Aruba den su totalidad.
RELATO ANTERIOR
Anteriormente Ministerio Publico a publica dos relato di prensa tocante e incidente lamentabel aki. Na interes di e investigacion, e unico cu por a bisa e tempo ey tabata cu ambos agente policial envolvi den e incidente di tiramento, ta wordo considera como sospechoso.
TRANSPARENCIA
Mientrastanto e avancenan den e investigacion ta haci posibel cu Ministerio Publico por duna mas transparencia. A scucha testigonan. A analisa imagennan y tambe a scucha e sospechosonan (e agentenan policial) varios biaha. Ademas ta haciendo investigacion tecnico.
ENVOLVI NFI
Debi na e complehidad di e investigacion tecnico a pidi NFI (Nederlands Forensisch Instituut, Instituto Forensico di Hulanda) pa realis’e. E evidencia cu mester wordo investiga a wordo traslada mientrastanto pa Hulanda y poni den man di NFI.
POLIS A LOS BINTI TIRO Y UN A ALCANSA E HOBEN
E investigacion tecnico a mustra te awor cu a los binti tiro, di cualnan un a alcansa e victima y a resulta inmediatamente mortal. Considerando e resultadonan inicial di e investigacion tecnico y e interogacionnan adicional di e sospechosonan, Ministerio Publico a dicidi pa persigui e dos agentenan policial. E dos agentenan policial lo wordo cita pa responsabilisa nan mes dilanti hues. Nan lo wordo acusa primariamente di ta complice di homicidio. Potret cortesia Max Ng
Corte a dicidi: Dos ‘spiritonan’ den caso Flamingo mester paga placa bek
AG ta conseha Corte di Casacion na januari '26 riba caso di Benny Sevinger
DEN HAAG – Abogado general (AG) na Hulanda diamars a dicidi cu e kier duna un conseho na Hoge Raad riba e caso di casacion di Benny Sevinger, osea . Dia 27 di januari 2026, e lo duna su conseho, y despues Corte di Casacion (Hoge Raad) ta stipula un fecha pa dicta nan sentencia. Unabez cu e sentencia ey cay, esey ta bira e ultimo ‘veredicto’ pa e caso. Si Corte di Casacion mantene e sentencia ultimo, esey ta nifica cu ex minister Benny Sevinger tin cu sinta su castigo di prizon conforme e ultimo sentencia. Loke ta usual tambe, ta cu mayoria biaha, Corte di Casacion no ta desvia di e conseho di e Abogado General. Esaki tabata e caso tambe di ex minister Paul Croes. E conseho tabata mescos cu e sentencia, y Croes mester a sinta su castigo. Pues e conseho di e abogado general ta un bon indicacion, kico ta spera sr Sevinger otro aña.
Huez a condena chauffeur cu a causa morto di trafico, na castigo combina di prizon y trabou comunitario
ORANJESTAD - Corte den Prome Instancia a trata ayera e caso penal contra e sospechoso J.K.F., kende ta wordo acusa di a causa un accidente di trafico riba prome di december 2023 na Savaneta, cu consecuencia mortal. Despues di e accidente el a huy sigui core; e no tabatin rijbewijs tampoco. Un pareha di turista cu a caba di yega Aruba a resulta gravemente herida. Un di e victimanan (75 aña di edad) a fayece e dia siguiente di e heridanan cu el a sufri.
Hof ta condena Aruba pa trahamento lento den caso di asilo
ORANJESTAD –Corte di Husticia Comun a condena ministro di Husticia di Aruba pa paga un compensacion di daño na un persona cu ta busca asilo, pasobra su procedimiento a dura mas cu un aña mas largu cu loke ley ta permiti. Corte ta constata cu e trahamento di e obhecion y despues apelacion contra e rechazo di un peticion pa proteccion internacional a dura total tres aña y cuater y mey luna.
Na december Corte Superior ta dicta riba e imposicion di castigo den caso di asesinato di Sayuri Petronia
ORANJESTAD - Ayera e sospechoso I.M.P. (21 aña) den e caso Last Call a presenta dilanti Corte Superior di Husticia. E caso ta trata di homicidio di e mucha muher Sayuri Petronia, kende a fayece riba 4 di juni 2021 despues cu P. a los tiro riba dje cu un arma di candela. E perdida di Sayuri a laga heridanan profundo cerca su famia y den comunidad di Aruba. Su tata ta sali regularmente den publicidad pa pidi atencion pa e caso y pa expresa su dolor. Ministerio Publico a bisa dialuna di tin consideracion pa famia di Sayuri, cu tin derecho riba reconocimento y respet.
Corte: Tratamento di apelacion caso Flamingo ta na juni 2026
ORANJESTAD – Hueznan di Corte Superior dialuna a determina cu e tratamento integral di e apelacion di caso Flamingo ta cuminsa dia 1 di juni 2026 y pa cual a reserva un siman completo pa trata esaki si mester. Dialuna a trata e asina yama regie zitting unda cu e defensa a haya practicamente tur nan peticionan aproba, cu ta mas bien pa scucha un cantidad mas di testigo.
Follow NoticiaCla
