Eman: No ta importa si e ta local of stranhero, pero e CEO nobo di airport mester ta capaz

ORANJESTAD - No ta importa si e ta local of stranhero, pero e CEO nobo di airport mester ta capaz. Esey ta pensamento di prome minister Mike Eman den un declaracion breve na e portal 24ora.com diamars riba e tema di Royal Schiphol Group. Manera ta conoci, RSG a para e contract na December y ta sali afo na juni proximo. Esey ta si nada cambia. Mientras cu sr Eman a haci e declaracion specifico riba ken mester bira e CEO nobo na e portal 24ora, den un comunicado cu gobierno a manda pa prensa, e detaye ey no ta inclui si. 

E COMUNICADO

E base di e comunicado ta cu mester fortalece y restablece e laso cu RSG. “ Prome Minister Eman a subraya e rol vital di Schiphol Group den e creacion y ehecucion di e proyecto, enfatisando cu su gabinete ta traha pa reestablece y fortalece e laso strategico cu Schiphol Group, cu a yega na un punto debil den ultimo añanan” e comunicado ta bisa.

SCHIPHOL GROUP: ALIADO STRATEGICO 

E comunicado ta sigiu bisa cu Schiphol Group ta un lider mundial den maneho di aeropuerto cu a proporciona supervision tecnico y experiencia specialisa desde e etapa inicial di desaroyo di Gateway 2030, te na e implementacion sofistica cu Aruba ta celebrando awe. "Sin e conocemento y direccion cu Schiphol Group a ofrece, e proyecto Gateway 2030 lo a bay dificil," Emana indica.

GANA CONFIANSA BEK

E meta di Gabinete AVP-FUTURO ta pa gana bek e confiansa y compromiso di un socio crucial den e mundo di aviacion, pa sigura cu Aruba por sigui beneficia di e experticio y red global cu Schiphol por ofrece. “Bou liderazgo di Mike Eman, e gobierno actual ta pone enfasis bek riba colaboracion internacional, infrastructura sostenibel y calidad den servicio publico. E reactivacion di e relacion cu Schiphol Group ta un paso den e direccion corecto pa consolida Aruba su posicion como hub regional den aviacion y turismo”.LOCAL OF NO

E declaracion di sr Eman ta interesante, mirando cu for di comienso di entrada di RSG, e intencion tabata cu mester a prepara un ‘yiu di tera’ pa e tuma over na cabez di aeropuerto como CEO. Sinembargo, despues di no menos cu 3 CEO apunta pa RSG, ainda no a apunta un yiu di tera. Esun cu mas ta wordo menciona, ta e actual Chief Operations Officer, esta sr Jürgen Benschop, cu desde cu e ultimo CEO Joost Meijs a bay casi un aña pasa, ta forma parti di un interim management team, hunto cu sra Barbara Brown y sra Aisha Anthony. Tur tres ta haciendo e trabou gerencial, banda di nan trabou. 

PROBLEMA TA LNT

Un di e problemanan cu RSG tin, ta e salario unda cu e ley nobo LNT (Landsverordening Normering Topsalariering) ta stroba e aeropuerto di atrae personanan capacita pa Aruba. Premier Eman den su declaracion na 24ora.com, a sugeri cu mester haci excepcion pa aeropuerto, pa asina por garantisa cu por atrae personanan capacita pa maneha e aeropuerto. Y ta aki ta unda cu e la declara, cu no ta importa si ta un hende local of hende stranhero ta maneha e lugar, basta e ta un persona capacita cu por atende cu e retonan cu e aeropuerto tin, mei mei di un construccion y reconstruccion masivo, Gateway 2030. Segun Eman, e hecho cu si ta un local of no, no mester ta un breakpoint pa logra mantene RSG na Aruba.