Sevinger: Ta apela sentencia di expropiacion di 840 mil florin

ORANJESTAD – “Sowieso nos ta bay den beroep”, tabata e prome reaccion di ex parlamentario Benny Sevinger na noticiacla diahuebs mainta, despues di a tende di Corte cu e mester bay paga 840 mil florin bek na pais Aruba den caso di expropiacion riba e caso penal Avestruz. Sevinger a persisti tambe cu ta un caso di persecusion politico cu tin contra dje. E la bisa tambe cu e tin hopi speransa cu e ta bay gana e caso den casacion tambe di su sentencia pa e caso Avestruz. Como tal, ora cu e gana e caso ey, e caso aki di expropiacion, lo wordo destrui of ta bay bek Hof. 

ACUSACION 

Segun Sevinger, ora cu e la haya e prome acusacion cu e la malversa 900 mil pico florin supuestamente cu e la haya di hende, e tabata sa cu ta bringando contra un instancia cu 100% poder ta mal usa nan poder. Sevinger a bisa cu ora cu e la puntra OM unda a haya e suma di 900 mil, a contesta cu ta parti di taxatie di su cas, cu ta un cas cu segun Sevinger, e la traha prome cu e la drenta politica. E diferencia ta cu ora cu e la drenta politica, e cas tabatin dos camber, y na caminda a expande esaki cu un camber mas y un cushina y un baño, unda cu e balor logicamente a subi. Y segun e ex parlamentario, ta djis coi e taxatie y e suma ta pone cu esaki ta e suma cu nan kier cobra. 

NO POR PRUEBA

Sevinger a bisa di ta sigur cu no por prueba nada. Hueznan ta basa nan mes riba e informacion di OM, y ta e di tres pia di e democracia. “Dificil pa bo gana un instancia asina ey. Y vooral den un comunidad chikito” Sevinger a sigui bisa. Nan no mester prueba nada segun e ex parlamentario. E lo apela e sentencia aki y cu algun dia e berdad lo sali na cla. 

CONTRINCANTENAN POLITICO

Na contrincantenan politico e tabatin un mensahe tambe. “Contrincantenan cu ta usa Ministerio Publico y OM ta laga nan usa nan pa schakel uit un otro politico, mi ta kere cu ta un vraagteken cu nos tur como ciudadano tin cu para un rato keto y mira. Si nos ta keda permiti esaki, anto e ora nos tur lo ta suheto na loke Ministerio Publico of e grupo ey den poder, ta mara na whoever nan ta persigi y e persona su chens ta hopi chikito pa e gana e hendenan aki”.