Formacion ta tranca awor pa posicion di minister plenipotenciario

ORANJESTAD – E motibo di problema pa forma un gobierno nobo, ta keda escohencia di persona pa yena funcion. Manera a bira e chiste den pueblo, ta mucho ocupa bringando cua popchi ta haya cua posicion. Si e intencion y boluntad tabatey pa awe dialuna keda cla cu e formacion y acudi na gobernador pa por los e lista di nomber di candidatonan pa minister, esaki tin cu warda algun dia mas. Por lo menos te diaranson of mas sigur diahuebs. Discusion ken ta bira e proximo minister plenipotenciario, ta awor e dolor cabez di e formadornan. Algo cu segun informacion, tabata conoci hopi tempo pero cu awor a bira un asunto primordial. 

E SITUACION

E problema ta cu partido AVP cu tin derecho pa nombra e minister plenipotenciario pa Hulanda, a pone un candidato cu no ta conta cu sosten di e partido di coalicion, esta partido FUTURO. Partido FUTURO a pidi pa nan tin ‘palabra’ den ken ta bira e persona, y mas aun, cu nan por ‘veto’ e voto, osea dicidi si nan ta pro of contra y cu si nan ta contra, AVP no por sigui cu e candidato ey. 

DESIREE CROES

Partido AVP a pone e nomber di Desiree Croes, ex director di Arubahuis, y miembro di partido, pero cu no a participa den e ultimo eleccion. FUTURO a protesta contra e nombracion ey, debi cu tin un relacion no sano entre e lider di FUTURO y Croes, cu ta un relacion di pasado. FUTURO su lider a propone e ora pa e actual secretario di e formadornan, comisario di polis Robert Candelario haya e funcion. Y ta aki ta unda cu e asunto ta trancando e formacion final. A compronde cu famia Croes, cu ta un famia raja berde, a pone presion tanto interno como publicamente (postnan riba Facebook) cu nan kier nan ruman bira, y a cuminsa saca informacion di pasado, contra e lider di FUTURO. Partido AVP por nombra un otro persona, pero ta sintiendo e presion di Croes, y tin cu ‘tene cuenta’ cu esaki. Y esey tin henter e proceso di formacion tranca.

100 DIA

Mientrastanto a pasa 100 dia desde cu e eleccion parlamentario a tuma lugar, y cu ainda no tin un gobierno forma. Notable ta cu hopi ta bruhando dos asunto, pensando cu 100 dia di gobernacion a cuminsa for di momento di eleccion, pero e realidad ta cu e 100 dia di gobernacion ta cuminsa for di momento cu e gabinete nobo huramenta. Pues oficialmente e 100 dianan no a cuminsa conta. Loke si ta un hecho ta cu e ta e formacion mas largo cu Aruba a conoci. Algun ta compare cu Hulanda, unda cu a dura casi 9 luna pa forma, pero esey ta na Hulanda.