Szabó: No ta aplasa fecha pa entrega ley nobo di Reino di Supervision pa Aruba

DEN HAAG – No ta intencion di gobierno Hulandes pa aplasa e fecha di 1 di mei 2025 pa entrega di e ley di Reino pa supervision financiero pa Aruba na Tweede Kamer y Parlamento di Aruba. Ta trata di e ley cu tabata yama RAFt, pero cual contenido mientrastanto a cambia. Asina e secretario di estado Hulandes pa Asuntonan di Reino Zsolt Szabó a bisa Noticiacla diabierna mainta. A puntra e mandatario durante un encuentro cu prensa despues di e reunion di Conseho di Minister di Reino riba e tema. “No ta mi intencion pa prolonga e fecha aki” Szabó a bisa cu firmeza. Ta bon pa sa tambe cu e ley original di RAFt, lo keda bari for di mesa den luna di Februari. Actualmente ta trahando riba un concepto estilo hibrido, unda cu e normanan ta regla segun ley di Reino y e resto den un ley local (landsverordening). 

NEGOSACION Y FORMACION LIHE

“Mi ta spera tambe cu pronto lo tin un gobierno nobo (na Aruba:red). Y mientras cu e no tey, mi lo sigui negosha cu e gobierno actual” e mandatario a sigui bisa. Pero e mandatario no kier tende pa un prolongacion si partidonan no keda cla. E no ta un suposicion aworaki pa e mandatario, kico lo pasa si pa e fecha ey, partidonan no keda cla pa entrega e concepto di e ley nobo. “Nos ta haci esfuerso ainda pa 1 mei 2025. Mi kier sigui traha pa e fecha ey”. E palabracion a wordo haci aña pasa pa e fecha di 1 mei, entrega e concepto di ley di Reino pa supervision financiero. 

TARDANSA

Mientrastanto tabatin un caida di gobierno di Aruba, un eleccion y awor ta den un proceso di formacion cu ta tardando mas cu e lo tabata mester. Y e tardansa aki ta pone cu e logro di keda cla cu e concepto pa entrega na Parlamento di Aruba y Tweede Kamer, ta birando un reto grandi. E siman aki mes (diahuebs) tabatin un reunion den Parlamento pa prome minister Wever Croes actualisa Parlamento riba e tema aki. Mientras cu no a haya un sentimento concreto di Parlamento riba e tema, a dicidi e ora y informa Parlamento cu lo sigui negosha asina mes, y ora cu Parlamento ta cla, pa stipula su punto di bista, lo bin bek y atende consecuentemente. Pero, manera ta wak awor, e fecha no ta cambia. Noticiacla diahuebs anochi ainda a puntra premier Wever Croes den e programa Noticiacla LIVE si por hala e fecha, y e mandatario a bisa e ora cu otro siman e lo haci un intento na Hulanda pa aplasa e fecha of wak si esey at all ta posibel. Awor ta conoci, cu e no ta posibel. Pues partidonan mester keda cla den 3 luna di tempo, pa e ley por keda entrega.