Huez ta dicidi diaranson si OM ta admissible den caso Flamingo

ORANJESTAD – Huez dialuna atardi a pospone tratamento di e caso penal Flamingo te cu diaranson mainta 8’or y mei, unda cu e lo anuncia su decision, riba peticion di e bloke di abogado defensornan. E decision si ta declara Ministerio Publico inadmissible den e caso, cu ta nifica posiblemente cu e caso no ta wordo trata mas. Si huez rechasa e peticion, e caso ta continua normalmente manera previamente programa. E caso ta trata varios aspecto di malversacion, labamento di placa y corupcion, y tambe abuso di poder. Cargonan cu ta wordo disputa pa e defensa di e varios sospechosonan cu a presenta den corte awe.

E CAMBIO

Manera cu Otmar Oduber a indica anteriormente, y manera cu e portal aki a raporta tambe, e dia a cuminsa cu e abogado Carlo pidiendo huez pa declara Ministerio Publico inadmissible den e caso aki, debi cu nan no a procede corectamente conforme ley, y a viola asina varios aspecto di e caso. Esaki ta varia di acepta un keho ilegal, faya durante e parti di entrada hudicial, presenta cargonan cu no tabata substancia y mas. Motibonan suficientemente serio pa hustifica e medida mas fuerte cu un huez por tuma contra Ministerio Publico, esta di declara nan inadmissible. Pa sorpresa, tur e demas abogadonan di e otro sospechosonan (4 na tur incluyendo Oduber) a uni cu e peticion di e abogado Carlo (di Oduber:Red), haciendo e caso aun mas interesante. Huez a pone cada un hustifica nan motibo specifico pa cual nan ta pensa cu OM no por trata e caso aki. Despues a duna fiscal e chens pa refuta esaki. Aki e fiscal a splica cu tur e puntonan cu a keda menciona, por wordo substancia y splica sin ningun problema, cu ta haci inecesario pa declara nan inadmissible. Ademas, durante e caso su proceso y investigacion, ningun momento Huez Comisario a remarca y nota iregularidad di parti di Ministerio Publico segun e fiscal. Y asina e la tira e puntonan bek pa e huez. Mirando e tempo, huez a dicidi pa suspende e caso y a informa cu lo dicta sentencia riba e parti aki, diaranson mainta 8’or y mei. Si e caso sigui despues, lo cuminsa cu e rekisitorio di Fiscal, sigui pa e defensa di e abogadonan. Cada pasa dia, lo trata e caso te na unda esaki ta necesario. Esaki tabata planea pa dialuna, diaranson y diabierna di siman, cuminsando awe te cu mas tarda dia 6 di December proximo. Si e sigui asina, huez por dicta sentencia pa fin di December, of suspende e caso y haya asina mas tempo pa traha riba e sentencia y esei kier men cu comienso di otro aña, lo conoce un sentencia den e caso aki. Fuera di Oduber, tin su propio yiu homber J, e ambtenaar E, un liaison P, y un otro persona di fam W.