Giovanny Trim a tuma partido UPP over y ta bay eleccion tambe!

ORANJESTAD – E conocido cantante, y awor politico Giovanny Trim ta tuma Partido Union Progresista (UPP) over y lo anuncia esaki diabierna atardi awor. Recientemente riba rednan social e la anuncia su disgusto cu e no a keda cla cu su partido pa registra esaki debi cu gabinete Wever-Croes a ‘benta gobierno abou prome cu e fecha deadline pa registra partido’. Cu esaki e la keda perhudica. Pero asina mes, noticiacla a compronde di fuentenan cerca di e proceso, cu Trim e ora a haci loke mas politico a bin ta haci, esta tuma partido existente over, y bay eleccion cu esey. Den e caso aki, e la opta pa partido UPP, cu tabata di ex minister Candelario ‘Booshi’ Wever. A compronde cu Wever lo no participa mas na eleccion y consecuencemente e partido lo a bira disponible. Como cu e partido ta registra ainda na Censo, e ta keda un partido valido pa participa.  E detayes, lo keda anuncia diabierna awor na e lansamento.