AVP ta cambia tata pa yiu: Yiu muher di Benny Sevinger lo ta riba lista pa eleccion

ORANJESTAD – Partido berde AVP lo presenta un candidato cu fam Sevinger, pero no ta Benny. Esaki por a compronde di un declaracion cu e lider di partido Mike Eman a haci durante un entrevista cu e portal 24ora.com dialuna. Aki ta unda cu Eman a divulga pa prome biaha cu e la papia cu yiu muher di Benny, Stephany Sevinger, cu lo reemplaza su tata riba e lista di AVP. E yiu actualmente ta bibando na Hulanda pero lo bin Aruba pa e eleccion, por a compronde di Eman. Benny Sevinger su momentum a cambia full desde cu corte di apelacion a aumenta su castigo pa caso Avestruz barbaramente cu 4 aña, cu ta pone cu lo bira mas dificil pa e por haci algo awor, y convence su siguidornan cu e ta ‘inocente’. Posiblemente internamente y personalmente nan ta mir’e como inocente, pero e realidad ta cu e la keda condena awor pa di dos biaha, y cu un aumento di castigo. Algo dificil pa ‘praat goed’. Pues ta pensa cu esaki ta e motibo cu a opta pa Benny no subi lista, pero cu un miembro di famia cu e mesun fam y cerca di Benny, lo ta suficiente pa toch sigura e votonan di Benny, sin cu mester tin e tinte di ‘culpabilidad’ pa un sentencia den un caso penal. 

DUDA

Den un combersacion cu Benny Sevinger durante e tratamento di e caso di apelacion, e la splica Noticiacla e tempo ey cu e no tabata sigur di su participacion y cu si ta of e of su yiu muher lo bay riba lista. Loke tabata sigur, ta cu e la dicidi cu e lo a bay riba lista un biaha mas, pasobra su hendenan ta pidie esey. Pues e ta haye un obligacion moral pa cumpli cu su siguidornan. Pero esey tabata tambe prome cu e sentencia a cay. Y ta conoci cu Benny mes no a spera nunca di a haya un sentencia ‘nobo’ dje estado ey, y como tal a fulmina contra esaki basta fuerte.

SILENCIO DI AVP

Cu esaki tabata un sla mortal pa AVP, tambe a keda comproba durante un otro entrevista cu e lider di partido tabatin cu e portal 24ora.com riba e prome reaccion despues cu e sentencia a cay. Aki Eman a confirma cu a reina un silencio hermetico pa hopi tempo pasobra e tabata un sla asina fuerte cu ainda e partido no a recupera di dje. Y esey a pone cu nan a keda keto, no a comenta, y cu posiblemente awor ta pone e yiu muher den e ring. Den e ultimo entrevista, Eman no a bisa cu ta pa e motibo ey ta cambia tata pa yiu, pero por compronde cu esaki ta e forma mas ‘logico’ pa anda cu e situacion aki. No ta conoci con e proceso aki lo tuma lugar. E yiu ta bibando na Hulanda cu su casa y yiu, y awor lo mester bin residencia na Aruba. Por lo menos temporalmente inicialmente y wak con e eleccion aki ta bay. Tempo lo bisa.