Corte: Headlines Group no mester rectifica contra minister Endy Croes

ORANJESTAD – E cas editorial di e portal 24ora.com Headlines Group no mester rectifica declaracionan haci contra minister Endy Croes, riba enrikesemento di e minister y su famia via Lotto Pa Deporte. Asina Corte a dicta den un sentencia diaranson mainta. Den e sentencia di 9 pagina, Corte ta motiva su decision di no ordena 24ora.com pa e rectificacion. 

MOTIVACION

Corte ta haya cu “ aunke e realidad huridico ta algo mas matisa di loke ta keda sugeri den e articulonan, e declaracionan no ta asina incorecto como pa resulta ilegal manera cu ta wordo sugeri”. Ademas corte ta bisa cu “ E base di e informacion ta basa riba un sentencia di corte, cu a wordo confirma. Por lo tanto, ta rechasa e peticion di Croes, pa rectifica e declaracionan haci”. Ta trata di declaracionan cu Croes y su famia, lo a enrikese su mes cu placa di Fundacion Lotto pa Deporte. E sentencia completo ta AKI.