Segun minister, cu cambionan positivo den SABA, ta laga problemanan di pasado atras

ORANJESTAD - Diahuebs atardi Minister di Asuntonan di Adulto Mayor a reuni cu Jacques van der Scheer, presidente di Conseho di Supervision di SABA pa nabega un curso nobo pa e futuro di SABA. Un encuentro cu e mandatario a yama uno sumamente fructifero cu ta habri caminda pa establece un relacion renoba cu SABA, reflehando un compromiso comparti pa progreso y bienestar di nos adultonan mayor. Di e forma aki ta cera un capitulo di añanan largo di conflicto y disputa entre SABA y Gobierno di Aruba. 

Un di e enfoke primario di e reunion tabata e solucion di e asunto pendiente di derechonan laboral (rechttrekking) cu ta data desde 2008, afectando numeroso empleadonan cu ta den espera di nan compensacion debido. Gerencia di SABA ta den proceso pa ehecuta e pagonan.

E anuncio di un directora nobo segun e mandatario, ta marca un era nobo den e trayecto di SABA su maneho y eficiensa operacional. E mandatario a sigura cu enombramento recien a ser acepta cu elogio for di su ministerio, mirando esaki como un momento pivotal pa fomenta un relacion mas saludabel entre Gobierno y SABA. 

Combersacionnan ta andando pa loke ta trata e subsidio pa 2024, y asina finalmente concretisa acuerdonan mediante e Landsbesluit. E paso aki ta subraya un dedicacion mutuo pa asegura stabilidad financiero y desaroyo sostenibel pa e cuido brinda door di SABA. 

Minister Arends a bisa tambe di ta sumamente satisfecho cu e hecho cu SABA ta duna su maximo esfuerso pa atende cu e amplacion di cantidad di cama. Esaki ta duna espacio pa aloca mas adulto mayor cu tin e necesidad di cuido 24/7.  E ampliacion ta aporta na e meta di Gobierno pa alivia e lista di espera pa luganan den cas di cuido y alabes ta significa e resolucion di SABA pa mehora infrastructura di cuido pa adultonan mayor.

Tambe a elabora ariba e infrastructura cu mester di atencion urgente pa asina por cumpli cu condicionnan vigente pa casnan di cuido. Sigur un punto hopi importante pa crea un infrastructura adecuado y facilidadnan accesibel pa garantisa e cuido di nos Adulto Mayor den un forma responsabel.