- SEO: Esfuerso di BZK pa mehora situacion financiero pa Aruba no tabata efectivo
- Nomber di Richard van Zwol ta circula pa reemplasa Alexandra van Huffelen pa Relacionan di Reino
- Wever-Croes: Kier bin cu caretera dwars door di refineria pa conecta San Nicolas miho cu Secrets Hotel
- Arends: Ola di calor ta peligroso pa adultonan mayor
- Partidonan PVV, VVD, NSC y BBB a presenta nan acuerdo di gobernacion
Un di Aruba su ciudadanonan mas bieu Frans Croes a bay sosega cu 105 aña di edad
ORANJESTAD – Net 7 luna despues cu e la cumpli 105 aña di existencia, awe den oranan di merdia, un Aruba su ciudadanonan di mas bieu y mas keri Frans Croes a bay sosega. Noticiacla a compronde cu ultimo tempo e curason tabata birando swak y no a wanta mas dialuna. Danki Dios, manera famia mes a bisa, e no a sufri den su ultimo ora. “E la bay trankil”. Y finalmente awe merdia, e la bay sosega cu e bunita edad respeta di 105 aña. Noticiacla pa ultimo añanan a hacie un custumber pa recorda cada aña cu Frans tabata cumpli. Un homber cu te cu algun luna atras, tabata hunga ajedrez tur dia ainda
TATA CONOCI
Manera ta conoci, Frans Croes ta tata di entre otro e conocida docente di musica Maybelline Arends Croes y Sandra Croes, hopi conoci den mundo di deporte. Hopi conoce Frans porta como e propietario di e conocido agencia di productonan di beyesa Fa Croes NV.
KEN TA FRANS CROES
Frans Croes tabata yiu di Jan Laurens y Dorilia Croes, e mayo di 4 yiu y e unico yiu homber. E mes a haya 6 yiu di cual Maybelline ta esun mayo. Frans a cuminsa traha na gobierno y despues a bay traha na Lago. Pero despues toch el a bolbe bay traha pa Gobierno unda cu el a traha te ora cu el a cumpli 50 y a baha cu pensioen adelanta. Aki ta unda cu el a dicidi di habri e agencia Fa Croes NV, y a basa su mes riba producto y meubulario di beyesa, ya cu su casa, conocido Aura Croes (dfm) tabata peluquera pa mas di 40 aña. Y no cualkier peluquera sino hasta tabata hof peluquera (a haci cabey di prinses Beatrix entre otro). Señora Aura a fayece lamentablemente 4 aña pasa. Si e tabata na bida, e pareha feliz lo a cumpli 75 aña di feliz bida matrimonial.
TRANKILO
Frans Croes tabata un persona alegre, trankilo, neutral, y cu a inculca principio di respet y disciplina den tur su 6 yiunan. “Nunca mi no a tende mi mayornan papia palabra malo”, e yiu mayo Maybelline ta conta Noticiacla algun luna atras ainda. Di un persona di e edad avansa asina cu ainda tabata core su auto cu 100 aña di edad, no mester ta sorpresa e ora cu ta na e edad di 70 aña, el a cuminsa siña toca guitara. Frans Croes, un homber trankil, recto y cu un forma di biba, cu a lague yega e edad hopi respeta y bunita di 105 aña. Noticiacla ta manda palabra di forza pa henter famia Arends y Croes, y desea nan hopi forza den e temponan nos dilanti. Aruba a perde un shon di hende, den tur sentido di palabra. Un tremendo ciudadano. Cu Frans Croes, sosega na paz.
"Ora e Curpa di un Hende Muhe Cambia: Menopausa"
ELMAR awe mainta a duna prioridad pa areanan unda cu tin scol cu examen, pa suministra coriente prome
ORANJESTAD – E baymento di coriente diaranson mainta a afecta varios scol unda cu alumnonan tabata den examen. Mirando esaki, Elmar a informa cu nan a opta pa duna scolnan prioridad pa cu esaki, y a percura pa suministra coriente prome na e area di La Salle Straat, Belastingkantoor y Solito un parti. Manera ta conoci, awe mainta coriente a bolbe bay den careda di 8:21 den e areanan menciona. Despues di mas of menos 30 minuut, coriente a cumnsa bin bek, dunando si prioridad pues na areanan unda cu tin scolnan cu ta pasando examen final.
Despues di conferencia di Elmar, coriente a bolbe bay ayera nochi y awe mainta
ORANJESTAD – Algun ora cu e compania di utilidad NV Elmar a tene nan conferencia di prensa riba e situacion di coriente, anochi atrobe varios area di Aruba a keda sin coriente pa por lo menos dos ora. E conferencia, en corto a bay detayadamente riba e situacion technico di e compania, y tur loke ta poniendo cu awe nos tin problema cu coriente. Loke a resalta ta cu mantenimiento ta e problema y cu nan ta purbando di resolve esaki. Anochi, coriente a bolbe bay. Y awe diaranson mainta algo despues di 8’or coriente a bolbe bay den varios parti di Aruba.
Corte a bolbe manda ABA y DUCAPRO sinta hunto riba cobransa pa musica
ORANJESTAD – E asosacion di radio emisoranan na Aruba ABA y DUCAPRO, e fundacion cu mester cobra pa uso comercial di musica registra, tin dos siman pa yega na otro riba e suma cu e fundacion por cobra radioemisoranan. Presidente di ABA, Aldrich Croes a confirma na Noticiacla cu ‘huez a duna partidonan 2 siman pa yega na un acuerdo’. De lo contrario, huez lo tin cu dicta un sentencia cu ta basicamente e suma cu mester wordo paga. Di parti di mr David Kock, cu ta representa DUCAPRO, tabata hopi positivo. “Nos ta basta cerca di otro” Kock a bisa Noticiacla. E tambe a confirma e 2 siman cu huez a duna pa partidonan yega na un areglo.
Aruba Ports Authority a keda sorprendi pa accion di 13 trahado awe
ORANJESTAD - Awe mainta trempan gerencia di Aruba Ports Authority NV a ricibi un e-mail di sindicato FTA cu lo tin un reunion cu algun empleado. E confusion a surgi ora cu a tuma nota cu no tabatin un reunion pero mas bien un grupo di empleado a “walkout” dilanti edificio di APA hunto cu e representenan di FTA.
Awor coriente no a bay un biaha sino dos biaha riba mesun dia
ORANJESTAD – Si e problema di coriente tabata semanal na Aruba, e la bira diario y dialuna hasta dos biaha riba e mesun dia. Prome tabata algo despues di merdia, cu coriente a bay na Seroe Blanco, Tanki Leendert, Sero Patrishi y besindario. Ora cu a anuncia cu esaki lo a keda remedia pa 2or, esta un ora despues, esaki a dura mas di 3 ora pa keda cla. Pero cos no a caba. Anochi, cuarto pa ocho, ata otro problema di coriente. E biaha aki den un area basta grandi, esta Balashi, Oranjestad y besindario. Esaki a resulta di ta un corto circuito riba e switch den un di e transformator station. Pues e biaha aki no tabata falta di e blaas di helium. A dura 45 minuut prome cu e prome casnan afecta por a ricibi coriente bek y pa 10’or Elmar a sigura cu tur hende tabatin coriente bek. Pa con largo, no ta conoci, pasobra e situacion na Aruba aworaki a bira di tal indole cu por spera un problema tur dia, varios biaha pa dia. Y na final, e acostumbrado ‘disculpa pa e inconveniencia’.
Follow NoticiaCla
