Minister Arends a firma MOU cu Hulanda pa fortalece sector primario den henter Reino

ORANJESTAD - Diahuebs   Minister Ursell Arends di Medio Ambiente y Naturalesa a firma un MOU hunto cu Minister di Naturalesa y Nitrogeno di Hulanda Sra. Christianne van der Wal pa fortalece e colaboracion entre paisnan di reino den area di recursonan natural.

E MOU aki ta establece asistencia mutuo, colaboracion y consultacion den Reino y asina promove e comparticion di conocemento, rednan di contacto y experticio ariba: 

1. E proteccion, maneho, utilisacion di recursonan natural. 

2. Fortalecemento di siguridad di alimentacion dor di desaroyo sostenibel di agricultura y pesca. 

3. Participacion den, y implementacion efectivo di, tratadonan internacional relevante.  

Segun minister Arends, e ta premira cu e fortalecemento nobo aki entre paisnan di reino lo tin un impacto positivo ariba nos sector primario y e bienestar di nos recursonan natural. Pues cada pais den nos reino lo por siña y beneficia su mes di otro. 

E MOU aki lo wordo presenta na e conferencianan di Convencion di Cartagena cu ta tumando luga riba nos isla e siman aki. E Convencion di Cartagena ta un tratado internacional cu ta destina pa protege y preserva e medio ambiente marino y costal den e region di Caribe.