SNBA: A surpasa 5000 firma colecta pa sostene hotel Secrets na San Nicolas

ORANJESTAD — Segun e presidente di Associacion di negoshi di San Nicolas,SNBA Errol de Freitas, nan a surpasa e cantidad di 5.000 firma diadomingo ultimo durante nan evento special. "Nos ta gradici tur esnan cu a bin San Nicolas pa firma pa apoya e proyecto y San Nicolas alaves.” Diadomingo 24 September durante e evento organisa pa San Nicolas Business Association (SNBA) “Say Yes to Secrets”, comunidad di Aruba a wordo invita pa firma e lista di apoyo pa e proyecto di Secrets Hotel por continua. Segun e organisacion, un publico grandi a asisti durante e evento cu a cuminsa 4or di atardi y a sigui te cu 11or di anochi. “Como un organisacion cu ta traha y enfoca riba e progreso comercial di  San Nicolas, SNBA ta sumamente gradicido cu e sosten cu a ricibi na e evento di clausura. E proyecto di Hotel na San Nicolas ta uno hopi importante pa e desaroyo y crecemento economico di San Nicolas pero tambe pa henter e pais. Inicialmente e hotel aki lo trece un 30 miyon di florin directamente den nos economia” e asosacion a finalisa bisando.