Defensa den region Caribe ta reforsa lasonan cu Colombia

CARTAGENA - E barku patruyero den Region Karibe Hulandes, Zr.Ms. Groningen, siman pasá a hasi un bishita na Cartagena, Colombia. E bishita aki den haf tabata den e lus di preparashonnan di ehersisionan marítimo konhunto, ademas asina fortalesé e koperashon den e ambito di siguridat den Region Karibe.

E barku di Marina Hulandes  Zr. Ms. Groningen i e barku Marinero di Colombia ARC Victoria, huntu a bandoná e haf di Cartagena riba djaweps 21 di Sèptèmber. E dos barkunan a hasi ehersisionan marítimo riba laman ganchu, tal manera tèst habilidatnan básiko di komunikashon i ehersisionan di maniobra. Ta di promé biaha, despues di un tempu largu, ku un barku Hulandes i unu di Colombia ta ehersé operashonnan asina intensivo ku otro.

E Komandante di Forsanan Naval den Region Karibe Hulandes, Komandante Walter Hansen, promé ku e ehersisionan, a organisá un resepshon na bordo di e barku patruyero. E huéspetnan a forma un grupo diverso prosedente di tantu Marina di Colombia, outoridatnan i kompanianan lokal, komo tambe representantenan di negoshinan i e komunidat Hulandes na Cartagena. Ademas Komandante Hansen por a sera konosí ku e tripulashon di e barku patruyero.

Colombia ta un partner stratégiko importante di Reino Hulandes den Region Karibe Hulandes. Delinkuensha transfronteriso, inkluyendo kontrabanda di droga, tin un efekto hopi destabilisador i haltu den paisnan di Region Karibe.  Kolaborashon intensivo entre Colombia i Reino Hulandes ta kontribuí na promoshon di seguridat i stabilidat internashonal den e region. Esaki ta un di e tres tareanan prinsipal di Defensa. NOTA: Texto ta scirbi den Papiamento fonetico diCorsou.