• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Huez a bolbe rechasa libertad pa polis Vos y ta trata caso comienso di December awor

ORANJESTAD – Bou di lagrimas e agente policial R. Vos a tende di Corte diahuebs atardi, cu e mester keda cera na KIA te ora cu su caso bin dilanti dia 8 di December proximo. Huez despues di a tende tanto argumentacion di fiscal como abogado Defensor, a rechasa e peticion pa suspende su detencion te e momento ey. Vos ta sospechoso di a proveni e informacion piolicial na e periodistanan y tambe di traficacion di persona. E ta cera ya 6 luna, y awor ta confirma cu e lo keda cera pa 3 luna mas, cu ta bira un total di 9 luna, desde cu e la cay cera na maart di e aña aki. 

FISCAL

Fiscal diahuebs a argumenta cu desde e ultimo biaha cu a trata e caso pro forma dia 6 di juli ultimo, ainda no a keda cla cu e investigacion te na e punto cu por pensa di laga Vos cu libertad. Manera a bisa biaha pasa, a logra di habri solamente 1 di e tres laptopnan confisca na e cas di Vos, y ainda falta dos. Ta hopi trabou esaki ta y no ta mira avanse den e proceso aki. E intencion tabata pa habri tur tres laptop y despues a base di e informacion ricibi, scucha  un grupo di periodista cu ta wordo marca como sospechoso den e caso aki.Ta trata aki di e periodistanan N. Andrade, B. Koolman, N. Giel,. A. Ponson y R. Laclé.  Fiscal a informa diahuebs cu a dicidi awor cu lo no warda pa habri e dos otro laptopnan, sino cu ta bay interoga e periodistanan aki y sigui cu e caso. Mirando e embergadura di e trabou, a pidi e huez pa no laga Vos den libertad ainda pasobra e por strobe e investigacion. Como tal a pidi huez pa pasa e caso bek pa Huez Comisario pa e interogacionan por tuma lugar. No a duna un fecha pa e interogacionan aki tuma lugar si. 

DEMANDA DI E ABOGADO 

Abogado pa e polis Vos, Bevinda De Sousa a protesta energicamente pa e loke cu e la keda confronta cu ne. Segun e abogado, desde e ultimo interogacion na juni, y despues e ultimo tratamento pro forma na juli, no tabatin ningun progreso den e caso. Tur e loke a wordo bisa e dia ey, a keda exactamente mescos 3 luna despues. A cuestiona seriamente pakico no a detene y interoga e periodistanan sospechoso ainda. Si a haci esaki, cos lo tabata mucho mas avansa y cu awor por a laga su cliente den libertad. Segun e abogado, Ministerio Publico a tuma e caminda di menos resistencia posibel y den cierto caso ta te hasta contradeci su mes den su defensa. Segun e abogado, si a detene y scucha e sospechosonan, por a haya e clavenan (passwords) di e laptopnan pendiente y asina keda cla mucho mas lihe. Ademas e ta cuestiona e argumentacion di fiscal riba e tema di falta di capacidad pa por haci e trabou necesario. E tabata kier sa si tin optro motibo y si pakico ta awor numa OM kier atende cu e periodistanan en cuestion. Pa loke ta e miedo di comparti informacion, e abogado a informa cu siendo den KIA, su cliente ta miho informa di loke ta pasa aki fo pues e nocion cu teniendo su cliente cera den KIA ta evita di stroba e caso, no ta valido. E abogado a sigui pa pinta e situacion personal di su cliente, particularmente su famia na cas, su dos yiunan y casa cu ta den pena. Mientras cu e ta conciente cu ta su falta, e realidad ta cu e yiunan ta sufriendo grandemente, no kier come, ta bou tratamento psycologico y tambe tin tendencia suididal. Ademas tin e posibilidad proximo cu e por perde e cas, debi cu pa falta di entrada, no por cumpli cu pago di e cas. Mientras cu abogado tabata presenta e caso, su cliente tabata visiblemente emociona y tabata yora. Dado momento mester a haya un lenso di seguridad pa por contene su mes.  Y finalmente Vos mes a haya chens pa papia, unda cu e la cuestiona e forma di opera, y a sigura cu siendo den KIA, informacion ta sali mane nada, pues e hecho cu e ta cera eyden, no ta yuda cu nada. Ademas, e la haci un apelacion hopi emocional na huez, cu awa na wowo, pa splica con flaco su yiunan a bira, pa e situacion, aunke cu e ta conciente cu e ta responsabel pa e situacion, e ta urgi pa tene tur loke e la bisa, na cuenta y pa asina e recobra su libertad temporal. 

FISCAL 

Fiscal den su reaccion final a bisa cu ta tarda mas cu normal pa analisa e informacion ricibi, y pesey a opta awor pa cambia nan strategia door di prosegui pa scucha e periodistanan testigo. E ta sigura cu e lo dura den tempo cortico. Asina mes, fiscal a pidi huez pa rechasa e peticion pa suspende detencion di Vos. E defensa di e abogado pa loke ta e situacion personal, no a keda substancia segun e fiscal y esey ta haci e evaluacion mas dificil. Tambe e cargonan contra e sospechoso ta pisa, y a sosode pa un periodo basta largo. A base di esey ta pidi huez pa rechasa e peticion. Alavez a pidi huez pa wanta e caso y pa trata esaki dia 9 di December proximo for di 8’or di mainta te 12’or di merdia.  

HUEZ 

E huez a scucha e partidonan y a informa e sospechoso cu e ta compronde su situacion cu e ta aden, pero asina mes, mester compronde cu e cargonan contra dje ta pisa, y cu dificilmente e por bay di acuerdo cu e peticion y como tal a rechasa e peticion formalmente pa Vos bay den libertad temporal y a bay di acuerdo cu e fecha di 8 di December proximo.