Minister ta confirma cu trahadonan di Saba ta ricibi rechttrekking e aña aki

ORANJESTAD – Minister Ursell Arends e siman aki a confirma cu trahadonan di Saba ta ricibi rechttrekking e aña aki. Segun e mandatario, no tin duda cu actualmente tin un cuenta habri cu e trahadonan di SABA y segun e minister, esaki lo wordo paga e aña aki. Esey ta locual e mandatario encarga cu Asuntonan di Adulto Mayor a confirma den Parlamento di Aruba dialuna, durante tratamento di e presupuesto supletorio 2023.

Segun e mandatario, pa hopi aña tin un disputa entre e tres partidonan, esta Gobierno, gerencia di Saba y trahadonan di Saba. Den pasado Gobierno a haci compromiso di lo paga e trahadonan di Saba un suma cu awe ta yega na aproximadamente 3 miyon florin. Esaki pa un asina yama “rechttrekking”. Gobierno por comproba cu e fondonan a wordo traspasa pa e doño di trabou, esta gerencia di SABA pa nan por paga e trahadonan. Pero gerencia di su banda ta bisa cu nunca a ricibi e fondonan ey. Mientrastanto e trahadonan a keda dal den bashi.

Minister Arends a bisa cu tur colega ministernan ta na altura cu Gobierno tin un cuenta habri, pero no cu Saba, sino cu e trahadonan di Saba. Tur minister sa tambe cu unabes tin claridad Gobierno mester cumpli cu e trahadonan. Na prome luga lo purba yega na e fondonan cu tin den presupuesto, pero si esey no ta posibel Minister Arends lo pidi Parlamento aproba fondo adicional. “Si esey ta e caso mi lo conta cu e ora ey tambe lo tin sosten di Parlamento completo pa por yega na e fondonan aki pa e trahadonan, pasobra ta nan derecho esaki ta.”