Gobierno a lansa e Concurso di Pintamento 2023 – Cacho den Cura

ORANJESTAD - E aña aki ta di cinco aña consecutivo cu Gobierno di Aruba ta organisa un concurso caminda a traves di nan pintura muchanan ta expresa y siña tocante Aruba su Ley di Cacho. E concurso aki a wordo carga e prome tres añanan door di Minister-President y despues door di Minister di Husticia. E aña aki e ta wordo carga door di Minister di Enseñansa, sr. Endy Croes, cu a dicidi di sigui e liña di e campaña cu Cuerpo Policial a inicia: “cacho den cura, ta ley e ta”. Pa es motibo e titulo di e Concurso di Pintamento 2023 ta “Cacho Den Cura”.

E meta di e Concurso di Pintamento 2023 ta pa sigui conscientisa comunidad, specialmente muchanan, tocante e cuido debido di nan mascota, y e muchanan na nan turno tambe lo por educa nan mayornan ora nan mira algo cu no ta cuadra. Si tur ciudadano di Aruba cuminsa inculca e atencion debido di nos leynan den nos muchanan, den e caso aki, e Ley di Cacho, nos lo por garantisa un miho futuro pa locual ta trata doñonan di mascota responsabel cu ta respeta e ley, y alabes nan propio cachonan.

Participacion ta gratis y ta habri pa tur muchanan di scol basico (1e klas - 6e klas). Minister di Enseñansa su deseo ta pa e mes of su colega Minister di Naturalesa bini cu un concurso pa scol primario (kleuter) rond di e luna di oktober. E aña aki probablemente ta e ultimo biaha cu Gobierno ta organisa e concurso pa scol basico di e manera aki, mirando cu ambos Minister anteriormente menciona, a caba di percura pa material di educacion tocante e tema por drenta scol primario y scol basico pronto, y pintamento similar lo forma parti di e material di educacion aki. Gobierno di Aruba ta hopi contento cu e participacion durante e ultimo añanan. Cu cooperacion di hopi maestra y maestro a registra mas cu 400 pintura na aña 2019, na aña 2020 mas cu 500 pintura, na aña 2021 mas cu 1000 pintura, y na aña 2022 mas cu 1200 pintura! “Ohala nos por conta cu un cantidad record e aña aki”, Minister Endy a expresa.

Pa e concurso di pintamento 2023, Bruce Harms un biaha mas a destaca cu su arte y a diseña un formulario di participacion di dos (2) pagina. Pagina uno di e formulario ta e pagina di instruccion y ta contene e informacion necesario pa por participa, y pagina dos ta caminda e muchanan tin di pinta un of mas cacho den cura segun nan propio imaginacion y demostra nan creatividad cu nan arte. E pintura mester ta original y por ilustra mas di e puntonan di nos Ley di Cacho. 

Dia 26 di augustus 2023 ta dia internacional di cacho, y semper a purba lansa e concurso riba e fecha aki. Mirando cu e aña aki e fecha ta un diasabra, a dicidi di hala e fecha cu 1 dia.

“Nos deseo ta pa tur scol participa y pa henter e comunidad di Aruba stimula tur alumno di scol basico pa participa cu nan talento na e concurso di pintamento 2023. Asina un bes mas, e concurso aki por ta uno exitoso.” Si no a ricibi e formulario di participacion ainda, lo por download e formulario via www.specialprojectsaruba.org tambe pa print pagina 2 (e print mag ta blanco cu preto).

E fecha final cu e muchanan por entrega nan formulario di participacion ta diabierna dia 22 di september 2023. Tene cuenta cu e alumno mester entrega e pagina di tarea (pagina 2) cu tur informacion completo pa por participa. Por entrega e formularionan di participacion na Bestuurskantoor Oranjestad, na HBK San Nicolas, of na e MFA mas cerca di scol.

Lo tin un regalito pa e ganadornan di cada klas. E ganadornan lo wordo anuncia dia 4 di oktober 2023, Dierendag, riba e pagina di Facebook di Gabinete Wever-Croes, y e muchanan lo wordo invita den e luna di oktober, despues di vakantie, pa ricibi nan regalito. NOTA: E potret cu ta acompaña e articulo ta di un concurso similar di pasado y no esun actual.