Polis na Corsou ainda no por proba cu morto di candela den cas tabata un crimen

WILLEMSTAD - Fin di siman tabata unu basta tristu, ku un morto den tráfiko, un otro kas ku a kima i un persona a resultá heridá pero tambe un otro kandela kaminda dos hende a pèrdè nan bida. Ta trata di kandela na un kas den Kaya Coleta V. Ostiana. Polis ta informá ku djabièrnè den kareda di kuartu pa 12 di anochi, polis i tambe brantwer a dirigí nan mes pa Kaya Coleta V Ostiana pa un kas ku tabata na kandela.

Na momentu ku unidatnan i personal di brantwer a yega na e adrès, nan a topa un kas na kandela i dos habitante, un hende hòmber i un hende muhé, ku a wòrdu saká for di e kas, pero ku tabata inkonsiente.

Ambulans a yega na e sitio, pero lamentablemente no por a hasi nada mas pa e víktimanan. Dòkter di polis ku a hasi akto di presensia, a konstatá morto di ámbos. Riba òrdu di fiskal di Ministerio Públiko, a konfiská e kurpanan, pa mas investigashon. Pa motibu ku ainda famia no a identifiká e dos kurpanan, no por duna e identidatnan liber.

A papia ku bosero polisial, sr. Mauritsz Rosalina i el a splika ku ainda no por papia di un krímen den e kaso aki. Konsekuentemente ainda no por bisa si e kas a keda intenshonalmente kimá òf ta un kandela ku a surgi pa otro motibu. Ta investigashonnan ku outoridatnan ta hasi lo mester proba esei. E tipo di investigashonnan aki por keda kla basta lihé pero a base di loke haña den tambe nan por dura mas largu, segun sr. Rosalina.

Riba e pregunta si e dos personanan aki a muri kimá den e kas òf si nan a stek debí na huma. Sr. Rosalina a bisa ku esei tambe ta outopsia mester revelá. Loke e por a mira ora nan a saka e kurpanan for di e kas ta ku nan no tabata mustra di tabatin kemadura. Pero un bia mas esaki tambe ta investigashon tin di proba. Meskos ku tin un boto na e kas ku tambe a haña daño di kandela. Esaki tambe lo ta parti di e investigashon pa mira si ta e kandela na e kas a pega e boto òf si e boto a keda pegá na kandela.

Tin basta rumor ta sirkulá di un persona ku lo ta esun ku a kima e kas aki. E rumornan aki ta papia ku e persona aki lo a menasá e hendenan di e kas aki algun dia pasá di lo kima nan kas.

Bosero polisial sr. Rosalina a bisa ku no por papia ainda di un krímen, manera el a bisa na kuminsamentu di nos entrevista. I naturalmente ainda no a detené niun persona.

E kos di mas importante awor aki segun sr. Rosalina ta pa determiná kiko a okashoná e kandela i pa por papia di un krímen òf no. NOTA: Texto ta scirbi den Papiamento fonetico di Corsou.