For di awe marduga, varios parti di Oranjestad tabata sin coriente atrobe

ORANJESTAD – Awe mainta y marduga atrobe, ELMAR a confronta problema cu suministro di coriente. E biaha aki esnan afecta tabata den Playa, principalmente Arendsstraat y besindario. E prome melding tabata pa 2’or y mei di marduga, y un ora y mei despues  suministro di coriente a ser reestableci den mayoria di area afecta. Pero despues pa algo prome cu 4’or di marduga a confrontando un problema den distribucion di coriente den e area di Hendrikstraat y vecindario. E causa ta un fayo riba un kabel subteraneo. Y asina e la sigui pa algo prome cu 5’or, unda cu ELMAR a confirma cu nan tabata confrontando un problema den distribucion di coriente den e area di Dominicanessestraat y vecindario. Algun rato despues a cuminsa reestablece suministro di coriente. Pa algo prome cu 7’or, ELMAR a bisa cu, cu excepcion di Arendstraat y vecindario, tur cliente tabatin servicio di coriente bek y cu nan tabata den proceso pa reemplasa un transformer pa por reestablece suministro di coriente. Pa 8’or a informa cu pa awe mainta prome cu merdia, tur cos lo tabata normalisa.