Eman: Van Huffelen ta ‘sorprendi’ cu ponencia di Wever Croes riba tema di RAFt

ORANJESTAD – Secretario di estado Hulandes Alexandra van Huffelen tabata sorprendi pa varios ponencia di prome minister Evelyn Wever Croes riba e tema di RAFt. Asina parlamentario Mike Eman a informa durante e reunion publico diamars riba e tema menciona, refiriendo na e cartanan di e mandatario Hulandes cu gobierno di Aruba mes a pone ‘ter inzage’, durante e reunion. Como cu noticiacla no tabatin aceso na e carta aki, ta referi na fragmentonan cu Eman a lesa di e carta di van Huffelen, cu a opta pa comparti esaki publicamente, pero cu e portal mes no por a verifica si. E punto segun e carta di van Huffelen, cu e parlamentario Eman a comparti ayera, tabata cu e mandatario Hulandes cada bez tabata sorprendi riba puntonan cu e prome mandatario di Aruba tabata presenta y referi na dje den su corespondencia riba e tema di RAFt, cu e mandatario Hulandes. 

DUDA DEN PALABRA

Specificamente, Eman a cita e.o. parti di e carta di van Huffelen, ‘het lijkt niet nodig gedetailleerd te reageren op overage delen van uw brief. Anders dan u stelt..’ indicando cu e loke cu premier Wever Croes ta bisa, ta diferente di loke cu lo a palabra cu van Huffelen. Textualmente traduci, ‘No ta necesario pa reacciona detayadamente riba demas puntonan di bo carta. Otro cu loke bo a presenta..”. Eman ta mustra cu e carta pues, cu por interpreta esaki cu Van Huffelen ta insinua cu minister presidente Wever no ta papiando e berdad. 

DEADLINE

Tambe Eman a referi na e deadline segun e carta di van Huffelen, pa e asunto entre Aruba y Hulanda keda regla, cu no ta 1 di oktober sino pa yega na un acuerdo politico pa 1 di September 2023. E deadline pa cual e debe ta madura, y cu tin cu paga bek, ta 10 di oktober 2023. Pero gobierno Hulandes kier un palabracion concreto prome cu e fecha ey, y esey lo tabata 1 di oktober di e aña aki, pero awor segun e carta cu Eman a lesa, esaki ta mas prome esta 1 di September proximo, esta otro siman. Noticiacla no a confirma esaki indepedientemente ainda si, pero ta den e proceso ey di confirmacion y lo informa ora cu ta asina leu. 

MOTIBO CU HULANDA NO KIER LAFT MAS

Eman a sigui pasa riba e parti di e carta cu ta referi na e motibo cu Hulanda lo no kier un LAFt mas sino cu e ta insisti riba un Rijkswet Financieel Toezicht, osea RAFt, y ta referi na e carta poni tambe inzage (cu noticiacla tampoco por a verifica independientemente) fecha di 7 di juli ultimo di van Huffelen, mustrando cu nan (Hulanda:red) tin problema di e firma unilateral cu Aruba a cambia e LAFt den pasado, cu ta bira motibo pa Hulanda pa tin extra control den forma di un Rijkswet. Tabata e tempo ey parlamentarionan Adi Thijsen y Rocco Tjon cu lo a trece cambio na e LAFt cu a pone cu awe Hulanda tin problema y ta exigi un RAFt.