ATIA tambe kier pa saca palabra ‘handelsgoederen’ for di e ley di BBO na frontera

ORANJESTAD – Fuera di e gremionan AHATA y AFBA, e gremio ATIA tambe a manda un carta diamars pa gobierno y pa DIMP riba e tema di ley di cobransa di BBO na frontera, cu ta wordo trata diaranson mainta den Parlamento. E contenido ta practicamente mescos, unda cu aki tambe ta sugeri pa saca e termino ‘handelsgoederen’ for di e ley, pa asina hacie mas miho pa comercio y evita cu gastonan lo aumenta drasticamente. 

HANDELSGOEDEREN

E termino handelsgoederen ta keda un problema pa ATIA, aun despues di sessionan di informacion cu nan a ricibi di gobierno y DIMP. Segun ATIA, e miho forma pues ta pa elimina e termino ey, y asina hacie mas cerca posibel di e sistema di BTW cu tabata e metodo cu tabata kier a introduci inicialmente pero no a keda cla cu ne. Door di elimina e termino handelsgoederen, ATIA ta mira cu e cumplimento di comerciante lo aumenta tambe mas. Si dado caso no logra saca e palabra for di e ley, mester por lo menos clarifica e definicion di tal forma cu e ta evita discusionan pa comercio cu por causa solamente mas problema. E carta tabata dirigi na prome minister y director di DIMP, Luenne Gomez Pieters. Por lesa e carta completo AKI.