Na Corsou, Corte a dicidi cu banco a actua corecto cerando cuenta di ex premier Schotte

WILLEMSTAD – Den un desishon di Korte di hurisdikshon Sivil, hues mr. Nootenboom-Lock ta konkluí ku e desishon di Orco Bank pa terminá relashon bankario ku Gerrit Schotte ta den nan kompetensia. E interes di banko ta pisa muchu mas ku e interes di Schotte i e desaroyo aki ta pa Schotte su mes falta, korte ta konkluí.

Despues ku Orco a sera kuenta di banko di Schotte, el a entamá un huisio sumario, obligá e banko pa habri e kuenta bèk i tene e kuenta habrí, no kanselá su tarheta di banko i no ehekutá niun akshon pa opstakulisá su transakshonnan bankario. Banda di esei Schotte a pidi tambe pa tene su uso di “mobile banking” i uso di “Internet banking” habrí.

Orco Bank a laga sera e kuenta bankario den luna di mei 2022 despues ku Schotte a yama pueblo pa hasi donashon riba su kuenta privá di Orco Bank. E akshon aki a bin despues ku Schotte a haña un veredikto ku e tin di paga Ministerio Públiko un suma di 1.8 mion florin.

Despues di esaki partidonan a sinta na mesa i a yega na un areglo. E kuenta bankario a bolbe habri, bou di sierto kondishonnan, esta e por risibí su salario  pa e paga su kosnan personal.

Pero a base di algun konstrukshon di algun kompania manera Carbino Holding B.V., ku tin akshon den un BV di Schotte, miéntras ku niun di e dos kompanianan aki no tin un kuenta bankario, pero ta hasi traslashonnan finansiero ku plaka kèsh. Banda di esei Schotte ta risibí salario for di Bodega Siete Gotas i tambe ta haña salario pa supuesto trabounan di “consultancy’ for i Hospitality Development & More (HD&M).

Dia 4 di aprel 2023 tabatin un enkuentro entre di Schotte i Orco Bank, kaminda ku Schotte ta pidi e banko pa e por risibí un suma di 530.000 florin komo fiansa personal for di HD&M. Komo kontesta Orco Bank a informá Schotte ku e ta sera e kuenta atrobe, dunando Schotte un tempu te ku 31 di yüli pa e por regla un ke otro i miéntras tantu e por risibí solamente 4.000 florin riba su kuenta privá.

Durante e tres lunanan tras di lomba Schotte a aserká diferente bankonan pa e habri un kuenta bankario, pero sin resultado.

Orco Bank a kibra relashon bankario ku Schotte despues ku vários depósito no konfiabel i kontra di e akuerdo ku nan tin ku otro. Schotte no por splika konkretamente di unda e plakanan ta bin. Ora a puntra kiko ta su relashon ku HD&M, el a entrega un dokumento o sea un kontesta vago di trabounan di “consultancy” ku e ta hasi pa nan.

E loke ku tambe e banko a enfatisá, ta ku nan no ke koperá mas ku depósitonan di plaka kèsh, kaminda ku no por averiguá di unda e plakanan aki ta bin. E asuntu pa komunidat depositá plaka riba su kuenta privá, a hasi esaki mas dudoso.

E echo ku otro bankonan no ke habri kuenta pa Schotte ta pa su mes falta, e veredikto ta bisa.

Korte ta konkluí ku e interes di banko ta pisa mas ku e interes di Schotte i di e forma aki korte a rechasá e petishon di Schotte pa obligá Orco Bank tene e kuenta habrí. E gastunan di proseso hudisial di 1.900 florin ta pa kuenta di Schotte. NOTA: Texto ta scirbi den Papiamento fonetico di Corsou.