Arends: A reuni cu directiva di SABA y RvT y ta spera solucion pronto pa impasse

ORANJESTAD - Minister Ursell Arends responsabel pa e cas di cuido SABA, a remarca diabierna cu e ta satisfecho con e reunion cu e directiva y Raad van Toezicht a bay y e tin tur confiansa cu lo haya un solucion pronto pero cu esaki lo rekeri esfuerso di tur dos banda. Tabata diahuebs mainta 15 di juni, cu e mandatario   a sinta na mesa pa asina habri dialogo constructivo pa solucion duradero na bienestar general. 

IMPASSE

Pa algun siman caba e topico di e impasse entre Gobierno di Aruba y SABA a bin ta ricibi hopi atencion den nos comunidad. For di Ministerio a tuma e stapnan necesario pa duna splicacion ariba e situacion y a remarca cu ta enfocando riba solucion. Den Parlamento di Aruba un mocion a wordo presenta pa Minister haci esfuersonan pa bolbe reuni cu SABA y RvT. Durante e reunion por a tuma nota cu tabata tin un ambiente constructivo, cada partido a trece informacion dilanti pa asina profundisa riba nan perspectiva den dialogo positivo. 

OTORGACION DI SUBSIDIO 

E punto cardinal di e impasse ta e proceso di otorgacion di subsidio cu mester wordo haci manera ley ta stipula. E leynan aki ta rekeri un accountantsverklaring di e instancia cual ta trece siguransa riba e transparencia di uzo di fondonan publico

SATISFECHO

Minister Arends ta remarca cu e ta satisfecho con e reunion a bay y e tin tur confiansa cu lo haya un solucion pronto pero cu esaki lo rekeri esfuerso di tur dos banda. 

DIALOGO

Dialogo lo continua den e periodo binidero pa por yega na palabracionnan concreto entre Gobierno di Aruba y SABA pa lo cual ta trata e derecho di e trahadonan y tambe e servicio di cuido pa nos adultonan mayor.