• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Opinion: Reaccion di Vacation Rental Professionals Aruba riba e informe huurmento di casnan vacacional y capacidad di carga

Scirbi pa Vacation Rental Professionals Aruba

Gobierno di Aruba a contrata Economisch Bureau Amsterdam pa evalua e impacto economico di e huurmento di casnan vacacional (VHR) y proposicion di posibel punto di maneho. Nos ta elogia Gobierno pa tuma e iniciativa di analisa e influencia economico di e sector aki. Como profesionalnan cu ta traha den e ramo aki, nos ta testigo di su potencial y a observa su crecemento como un componente significativo di e inventario di acomodacion di e industria turistico di Aruba.

Lamentablemente, nos mester expresa nos decepcion cu e informe ta contene diferente deficiencia. En bes di profundisa den e evaluacion economico y e consecuencianan di casnan vacacional, e informe ta concentra riba e conexion entre e sector aki y e accesibilidad na vivienda, e escasez di casnan y turismo excesivo, mustrando un prehuicio inhustifica contra stranheronan. Nos ta limita nos reaccion pa señala cinco defecto grandi y importante di e informe.

Pa cuminsa, e base di e informe ta eroneo. E afirmacion cu nos sector ta pusha e prijsnan di cas no por saca esaki afo di e conclusionnan di e informe. Pues den e conclusion no ta mustra cu a proba cu esaki t’asina. E informe ta carece di un analisis pragmatico di prijsnan di cas, ya cu e no ta evalua e factornan crucial cu ta influi den e prijsnan di vivienda na Aruba, manera costo di material di construccion, belasting pa importacion (invoerrechten), terenonan disponibel y maneho pa cu esaki, entradanan di consumidor, preferencianan di e consumidor pa cu vivienda (p.e.. area, tamaño di cas y tamaño di tereno), tipo di hipoteca, y con e mercado di demanda y oferta di cas ta ahusto su mes a largo plazo. Por lo tanto, evaluacion di e factornan cu ta impulsa e prijsnan di vivienda ta exigi un analisis solido y amplio, cu lamentablemente no ta presente den e rapport aki.

Incluso si acepta e pensamento di e informe cu e huur di casnan vacacional ta asocia di algun forma cu e aumento di prijs di cas, e datonan presenta riba Tabel 4 di pagina 12 no ta apoya e pensamento ey. Por ehempel, por deduci di e informe cu e casnan vacacional ta responsabel di aumento di e prijsnan den e zonanan manera Noord, Oranjestad y Eagle. Sinembargo, ki ta pasa na Santa Cruz, unda cu e casnan vacacional ta representa solamente 1% di viviendanan di e sector aki, of na San Nicolas, cu e 2%? Den e zonanan aki no tabatin aumento di prijsnan di cas?

Na di dos luga, e informe ta afirma riba pagina 12 cu e impactonan negativo di huurnan di casnan vacacional “tin un peso significativo”. Un biaha mas, no tin ningun prueba pa e afirmacion aki. E encuesta di opinion realisa door di ATA (nota: un bon iniciativa, pero uza di forma incorecto den e estudio aki) tabata consisti di puntra esunnan encuesta riba nan preocupacionnan y conta e cantidadnan aki pa determina cual di nan ta mas scogi como contesta. Sin embargo, ta importante señala cu e frecuencia no ta implica clasificacion of importancia. Esaki ta un regla fundamental den creacion y analisis di encuestanan. E encuesta di opinion no tabata inclui un pregunta den cual ta pidi esnan encuesta evalua e peso di e aspectonan positivo compara cu esnan negativo. Por lo tanto, por considera incorrecto e

Afirmacion di e informe cu e impactonan negativo di huurnan di casnan vacacional “tin un peso significativo”.

Na di tres luga, nos ta reacciona riba e evaluacion di e impacto economico di huur di casnan vacacional. Segun e informe, e sector aki di huur di casnan vacacional tin mas camber cu hotelnan y timeshare, y su aporte economico a subi di 71 miyon dollar na 2019, pa 153 miyon dollar na 2022. Sinembargo, e cifranan presenta riba pagina 11 pa loke ta tamaño di e inventario di huur di casnan vacacional ta confuso. Concretamente, e cifranan riba pagina 11 no ta duna un bista cla y ta pone duda riba su confiabilidad. E diferncia di casi 800 unidad, cu ta representante aproximadamente un 23% (entre cifranan presenta door di ATA y Banco Central di Aruba cu lamentablemente no ta duna un informe accesibel), ta haci e dudanan mas grandi. E discrepancianan aki ta hustifica un scrutinio riba e veracididad y credibilidad di e datonan insigur aki. E informe ta carece un splicacion profundo di e procedura di reconteo, loke ta contribui na crea mas confusion rond di e asunto aki. Lo tabata preferibel pa e consultornan mes realisa un conteo profundo di e inventario, basando nan mes riba fuentenan di datonan primario (firsthand), en bes di confia riba datonan secundario cuestionabel.

Ademas, riba e mesun pagina, e consultornan a haci un suposicion riba e gasto pa calcula e balor di e reservacionnan. Sinembargo, e suposicion aki nunca a wordo exponi bon cla, loke ta keda ilustra den e enfoke opaco di e informe. Combinando e conteo di datonan dudoso y e suposicion di gastonan (cu no ta mucho cla), ta hopi cuestionabel pa confia den e resultado economico di huurmento di casnan vacacional. Con ta splica cu e gasto a duplica di 71 pa 153 miyon dollar den solamente tres aña? E informe no a menciona nada di e punto critico aki.

Na di cuater luga, e recomendacionnan politica di maneho presenta den e informe ta un mescla di normanan cu a ser aplica na otro paisnan. Den capitulo 2, e consultornan ta discuti varios practica di maneho sin splica suficientemente cual lo ta esunnan mas adecua pa Aruba y splica e motibo pakico: ta importante considera e contexto specifico ora di crea y desaroya un maneho politico.

Ademas, a conecta e recomendacionnan cu e asunto di overtourism sin discuti profundamente si esaki ta existi na Aruba. E concepto di overtourism no ta hopi cla y ta habri pa debate den literatura, y ademas e ta hopi suhetivo. Loke un persona por percibi como turismo excesivo, otro ta mira esaki como beneficioso. Uso di overtourism den e contexto aki sin mas, por crea e impresion di un prehuicio pa cu e stranheronan cual ta un pensamento peligroso teniendo cuenta cu e lazonan economico, social y cultural di Aruba cu mundo.

Por ultimo, ta dificil pa afirma cu e sector aki di huur di casnan vacacional (VHR) ta principalmente influencia door di stranheronan (pagina 12), mientras cu na mesun momento ta bisa riba e mesun pagina cu solamente 11% di e inventario ta propiedad stranhero. E cifra aki aki ta contradeci e mesun afirmacion, ya cu e ta nifica cu 89% di e sector ta den man di hende- of companianan local. E mayoria aki ta indica un distribucion importante di beneficio pa e residentenan local, haya via di e sector aki di VHR: un aspecto importante cu no a tene cuenta cu ne den e informe.

Loke realmente mester, ta un estudio sistematico y profundo di e sector di huur di casnan vacacional na Aruba. Desafortunadamente, e informe aki no a cumpli cu e dos principionan aki y no ta sirbi como un base solido pa un enfoke basa riba evidencia. Mientras cu nos organisacion ta apoya un enfoke mas planifica pa garantisa cumplimento (a base di registronan oficial), e normanan di calidad y siguridad, y e aplicacion di medidanan pa salvaguardia eficiencia y eficacia di e mercado na beneficio di comunidad di Aruba, nos ta profundamente decepciona